Wir Ferdinannd von Gottes genaden Römischer künig zu allen zeitten merer des Reichs in Germanien, zu Hungern, Behaim, Dalmatien, Croatien vnd Sclauonien etc. künig,
Infant in hispanien, Ertzhertzog zu Osterreich, hertzog zu Burgundi, Marggraf zu Mährern, hertzog zu Lucemburg vnd in Slesien, Marggraf zu Laußnitz etc. Bekennen
offenntlich mit disem brief, Als vnns die wirdigen, Wolgebornen, Gestrengen, vnnsere andächtige vnd lieben getrewen, Ihan von Wartenberg, öberster Maister des Behamischen Pri=
oratts sannd Johanns Ordens in Strakonitz, Vnnd in, ritter vnd ordens Brüeder, In gemain in demselben Priorat gehörig, yetzo auf vnnser genedig ansuechen vnd begern, zu ainer hilff
wider vnnsers heiligen Cristenlichen glaubens Erbfeindt den Türggen, Acht Tausent guldin Reinisch, hunderthewtigist züzaichen vnnd zugeben bewilligt, Vnnd aber vnns zu er=
kennen geben, Wie sy mit solcher Summa, so eylendts nicht gefast sein mügen, Sonnder solches auf vnnderphanndt Irer Ordens guetter, oder auf pürgen vnnd briefe aufbrinngen
müesten, vnnderthenigclich bittendt, das wir als künig in Behaim, Ertzhertzog zu Osterreich vnnd oberster hertzog In Slesien, In solche verphendung, Oder verpürgschafft, welch
gestalt sy gelt aufbringen möchten, zubewilligen, genedigclich geruechten, das haben wir gethon, Bewilligen, zuelassen auch hiemit wissentlich in Crafft dits briefs,
Also das gedachter Oberster Maister in Strakonitz mit Rat seiner eltisten Brüeder solch gelt, Als nemblich die Acht Tausent guldin Reinisch, Vnnd so uill sich vngeuerlich
Interesse darvber lauffen möchte, zu berürter notturfft aufbringen soll vnnd mag, Vnnd welcher gestallt solches beschehen mag, Pfanndtlich auf des Ordens guetter, oder
auf bürgen, vnnd durch des obersten Maisters, mit Rat der Brüeder, brieff vnnd Conuents Innsigel aufgericht vnd verferttigt wirt, soll pündig vnnd krefftig sein, als wär
das von weltlichen personen beschehen, das sich ain yeder bürger, was wirden oder stanndts er sey, gaistlich oder weltlich, an dem Maister vnnd auf des Ordens guetter, seines
schadens, erholenn mag, Vnnd sy aines oder mer stuckh, von Ires Ordens heüsern oder guettern, vmb die Summa, wie obsteet, versetzen vnnd verphenden, Sölches alles
sollen vnnd mügen sy thuen, an vnns vnnserer Erben vnd nachkhomenden, künig zu Behaim, Ertzhertzogen In Osterreich, vnnd hertzogen In Slesien, Irrung, hinder=
nus vnnd widersprechen, Dabey wir ainen yeden hanndt haben vnnd schutzen wellen, vngeuerlich. Mit vrkhundt dits briefs, Besigelt mit vn=
serm künigclichen anhanngendem Innsigel, Der geben ist in vnnser Stat Wienn, den Ain vnd zwaintzigisten tag des Monats Decembris, Nach Cristi vnnsers lieben
Herzn gebürde im fünfftzehen hundert vnnd Acht vnd dreissigisten, Vnnserer Reiche des Römischen im Achten, Vnnd der anndern im dreyzehenndtn Jaren.