Wir ferdinannd von Gottes genaden Romischer kunig zu allen zeitten merer des Reichs in Germanien zu hunngern Behaim Dalmatien Croatien (etc.)
kunig Infannt in hispanien Ertzherzog zu Osterreich herzog zu Burgundi Marggraf zu Marhern herzog zu Luczemburg vnnd in Slesien Marg=
graue zu Lausitz (etc.) Bekhennen fur vnns vnnsere erben vnnd nachkumen kunig zu Behaim offennlich mit disem brief Als vnns die
wirdigen Wolgebornen getreuen vnnsere Andechtigen vnnd lieben getreuen Hanns von wartemberg obrister maister Sannd Johanns ordens des Behaim=
ischen priorats zu Strakonitz vnnd die Ritter vnnd ordensbrueder in gemain zu dem selben priorat gehorig Jetz auf vnnser genedig an suechen vnnd
begern zu ainer hilff wider vnnsers heilligen Cristlichen glaubens Erbfeindt dem Turgken Acht Tausent gulden Reinisch vnderthenigist zu raichen
vnnd zu geben bewilligt die wir also von Jnnen genedigclich angenomen vnnd darauf gedachten obristen maister Riter vnnd ordensbruedern Sand
Johanns ordens zuegesagt vnnd geredt haben Thuen das auch hiemit wissentlich in Crafft ditz briefs das Jnnen Jren nachkomen vnnd dem gedachten
orden dise obbemelte Jr bewilligung so sy vnns also vber all annder mitleiden so sy sonnst mit den Lanndtschafften neben andern Jnwonern
tragen allain aus guetem willen Cristlicher lieb vnnd zu kainer gerechtigkait gethann an Jren priuilegien wolherbrachten vnnd durch vnns Con=
firmierten freyhaiten vnnd gerechtigkaiten die sy in guetem gebrauch haben allerding vnuergriffen vnnd vnschaden sein vnnd Jnnen auch solches
daran kainen Einganng oder nachtail geben solle in kainerlay weis vngeuerlich mit vrkund ditz briefs Geben in vnnser Stat Wien
den ain vnd zwainzigisten tag des monats Decembris Jm funfftzehnhundert Acht vnd dreissigisten vnnsere Reiche des Romischn im Achten
vnnd der anndern im dreitzegenden Jaren
Ferdinand