Ich Seifrid von plench. vnd ich dAgnes sein havsfrovw. Iehen vnd tvn chvnt allen den die disen prief lesent. oder horent lesen.
die nv lebent. vnd her nach chvnftich sint. daz wir. ich vnd mein havsfrovw. die vorgenant vnd alle vnser erben mit gute(m) wille(n).
vnd gunst vnd vdachte(m) mut vnd mit gesament(er) hant zv der zeit do wir iz wol getvn mochte(n) v(er)chavft haben vnsers rehten vreien
aigens ain gantzes lehen. daz leit enhalbe der pulka zeSinentzendorf. wiharten vnd seiner havsfrovwen f(ra)v katerein. also. daz wir
die aigenschaft ich Seifrid von plench. vnd mein havsfrovw dAgnes. geben. dem gute(n) sand Johans. vnd den brude(r)n des selben ordens
zegeurps. vnd Wiharten vnd seiner havsfrovwen f(ra)v katerein zerehtem pvrchreht von den h(er)ren zegeurps. zehaben. vnd allen.
den er daz selbe lehen v(er)cheuft. vnd noch im besitzent. also. daz si von dem selben lehen alle Jâr den vorgenanten h(er)ren zegeurps
dienen schullen sehtzich phenning wienner mvntz an sand cholmans tach. Daz nv disev red stet vnd vnzebrochen beleib. des
geb wir den vorgenante(n) h(er)ren zegeurps disen prief zeainem stätigem vrchvnde. vnd zeainem offen gezeug. vnd zeainer
ewigen vestenung diser sache. v(er)sigelt mit vnserm insigel. vnd mit hadmars insigel. von schonenw(er)ch. vnd mit wulfinges vnd
alt(er)s insigel von puchp(er)ch. die diser sache gezeug sint mit ir(n) insigeln. Vnd ist auch gezeug h(er) dit(r)ich von ymmendorf. vnd
h(er) chvnrat vo(n) flevndorf. h(er) symo(n) vo(n) leubs vnd leuprecht von ymmendorf. vnd Ruger von dem obreches. vnd hainrich vo(n) zwinge(n)
dorf. vnd Stephan von zwingendorf. vnd Ruger von harras. vnd Gotfrid vo(n) harras. vn(d) ander biderw leut genvg. den disev
red vnd sache chvnt ist. Diser prief ist gegeben do von christes geburt waren ergangen Tausent Jâr. drev hund(er)t Jâr. vnd in
dem zwelften Jâr. des nehsten mentages vor sand cholmans tag.