Ich Wolfram vnd mein housvrow div Geisel von Patzmansdorf vnd vnser paider erben veriehen vnd tvn chvnt
allen den die dē prief lesent oder horent lesen die nv lebent vnd her nach chvnftich sint daz wir mit gutem willen
vnd mit gesamter hant vnd mit zeitigem Rat dem guten sant Johans vnd brud(er) Hainreich von chapel ze
den zeiten comendewer vnd den brudern ze Mæysperge czechoufen gegeben haben ain lehen vnsers rechte(n) aigens
ze Marchartsdorf zeden zeiten do wir ez wol getvn mochten vmb drev vnd viertzich phvnt phennig wienner
minzz der wir iedleich vnd recht gewert sein do ist auf dem vorgenante(n) lehen zeden zeiten gesezzen Pærchtolt
dez tevfels aydem vnd der selbe vorgenant Pærchtolt schol dem hous vnd den vorgenante(n) bruder(n) ze Mæysperge
dienen alle Iar an sant Iorgen tag zwen vnd dreizzich phennig wienner minzz Daz nv disiv red vn(d) diser
chouf stæt vnd vnzerbrochen bleib dez setze wir vns ich Wolfram vnd mein housvrow div Geisel vnd vnser
paider erben ze rechtem scherme vür alle ansprach als landes vnd aigens recht vnd gewonhait ist in
Osterreich vnd sigeln disen prief mit vnserm insigel zv ainer stæten vestenung vnd zv ainer offener
wærnung vnd mit den geziugen die her nach geschriben(n) sint her Diether von Ymmedorf H(er) empprecht
von Ymmedorf Iorig der Hæhsse von Marchartsdorf Rapot von Patzmansdorf Wernhart d(er) parvizze vo(n)
Patzmansdorf vnd ander piderbe levt genvg den disiv red vnd chouf chvnt vnd gewizzen ist Do disiv
red vnd chouf ergangen ist do warn von christes gebvrt ergangen Tovsent Iar drev hvndert Iar
dar nach in dem vierzehente(n) Iar nach sant Mærtins tag dez nehsten phinztages