Ich Wulfinch von Pvechperch Vnd ich Alber sein prveder Wier veriehen vnd tvn chvnt allen den die disen Prief lesent oder horent lesen die nv lebent vnd
hernach chvnftich sint. Daz wir mit aller vnser erben gvetem willen vnd gvnst mit verdachtem mvet vnd mit gesamter hant zv der zeit do wir iz wol getvn
mochten Verchavft haben vnsers rechten Aigens Zway lehen die da ligent datz dem Diepoltz vnd anderhalbe Hofstat da selbens Vnd da man von dient alle Jar
zerechtem dienst Zwaymin fvnfzig metzen Waitz gvte Gotzer mazze Vnd zehen vnd Aindlef schilling phenning gvte vnd Vierzchen chaese daz ie der chaese
Acht phenning wert sei Vnd zway Hvener. Vnd den vorgenanten dienst svln die holden die awf dem vorgesprochen gvet sizzent antwurten alle Jar mit ir fver
antweder hintz Wienne oder hintz Chrems an alle wider rede vnd an allen chrieg. Daz vorgenant gvet alles haben wir recht vnd redlichen verchavft mit
allen dem nvtz vnd recht als wir iz in nvtz vnd ingewer her pracht haben vmb Sibenzich phvnt Wienner phenning der wir recht vnd redlichen ge
wert sein Dem Erbern herren prveder Hainreichen von Chastel zv den zeiten maister des hawses ze mawerperig Vnd der Samnvnge gemain des selben
hawses ze mawerperig fvrbaz ledichleichen vnd vreyleichen zehaben vnd allen irn frvmen da mit zeschaffen verchavffen versetzen vnd geben swem si
wellen an allen irrsal. Vnd dar vber dvrch pezzer sicherhait so setzen wir vns ich Wulfinch von Pvechperch vnd ich Alber sein prveder fvr vns vnd
fvr alle vnser erben vber daz vorgenant gvet alles dem erbern herren prveder Hainreichen von Chastel zv den zeiten maister des hawses ze mawerperig
vnd der Samnvng gemain des selben hawses ze mawerperig zerechtem scherm fvr alle ansprach als Aigens recht ist vnd des landes recht ze Osterreich.
Daz diser chawf vnd dise sache fvrbaz staet vnd vnzerprochen peleib dar vber so geben wir ich Wulfinch von Pvechperch vnd ich Alber sein prveder Dem
erbern herren prveder Hainreichen von Chastel zv den zeiten maister des hawses ze mawerperig Vnd der Samnvnge gemain des selben hawses ze mawer
perig disen Prief zv ainem sichtigen vrchvnde vnd zv ainem waren gezevg vnd zv ainer ewigen vestnunge diser sache versigelten mit vnsern Insigeln
vnd mit hern Lvdolfs Insigil von Ebersdorf chamerer In Osterreich vnd mit hern Albers Insigil von Chvnring die diser sache gezevg sint mit irn Insigeln.
Vnd sint avch des gezevg prveder Hainreich von Pvnzendorf zv den zeiten Comitewr des hawses datz sand Johans ze Wienne prveder Vlreich der prior von
harras. Prveder Vlreich der hvebmaister von mawerperig herman der Stralmayr von mawerperig vnd ander frvm levte genvech den dise sache wol
chvnt ist. Diser Prief ist geben ze Wienne do von Christes gebvrt waren ergangen Drevtzehen hvndert Jar In dem Viertzehenten Jare dar nach an sand
Veites tage