Wir Graf Burchart purgraf ze Nurnberg vnd Graf ze Hardekk veriehen vnd tun chunt allen den die disen prief lesent od(er) hoerent lesen die nu lebent vnd hernach
chunftig sind Daz wir mit vnser erben guten willen vnd gunst mit raten mut zu der zeit do wir es wol getun mochten verchauft haben vnsers rehten aigens
an aht pfuntig zwelif pfunt wienn(er) pfennig geltes die da ligent ze Lugezdorf auf lehenen gut behawsen holden vnd auf alle den vnd dar zu gehoert ze
velde vnd ze dorffe wie si daz genant ist vnd da zu den gerten auf gesezzen sind die holden die di selben gult dienent die hernach an disem prief geschriben stent
daz ersten Perhtolt der fleischak zwainzik pfennig von eime viertail Herman der schuhmach(er) zwainzik pfennig von eime viertail Ott der Linsidel siben schilling vnd
drey pfennig von eime halben lehen Leupolt der weize siben schilling drey pfennig von eime halben lehen L... der troppel siben schilling drey pfennig von
eime halben lehen Chunrat der chrelser siben schilling drey pfennig von eime halben lehen Perhtolt der nedling siben schilling drey pfennig von eime halben lehen Jans
der pischoff siben schilling drey pfennig von eime halben lehen Vlreich der phaff Neun schilling sehs pfennig von eime halben lehen Hainreich der smyd
vierzehen schilling sehs pfennig von eime lehen Joerg der schuester siben schilling drey pfennig von eime halben lehen dez Hechtens chinder siben schilling vnd
drey pfennig von eime halben lehen Jacob haigen thun vierzehen schilling sehs pfennig von eime ganzen lehen vnd ist auch daz der selb gult an reht(er) taylung
an gevallen gegen vnser swester do wir mit ein ander getailt haben Die vorgenant(en) zwelif pfunt wienn(er) pfennig geltes an aht pfuntig haben wir reht vnd
redleich verchauft vnd geben mit allen den nuzen vnd rehten als wir si in aigenz gewalt her praht haben vmb and(er)thalb hundert pfunt vnd vmb sehzikhalt pfunt
vnd vmb sehzzehen pfennig wienn(er) munz der wir gar vnd ganczleich gewert sein dem erber(n) gaistlichen herren herren Wernher von wienn sand Johans orden
vnd dem haus ze Meurperig stetig ledichlichen vnd vrileich ze haben vnd allen irn frumen da mit ze schaffen nach irn pflegen vnd geben in si wellen an
allen irrsal vnd schullen auch wir noch vnser erben furbaz auf daz egenant gut od(er) der vorgenant(en) gult auf l... es sei ze veld vnd ze dorff wider mit worten
noch mit gerichte noch mit phantagung noch mit chain(er) lay sach nimmer mer chain anspruch noch chain reht haben noch gewinne(n) weder vmb vil noch vmb
wenig an swaz an den holden get daz schulle(n) wir rihten also swenn daz ist daz iemant den tod neme vnd daz der selb mensch auf daz egenant ir gut
chumt ze veld od(er) ze dorffe oder da auf gesezzen ist so schulle(n) si oder ir amptman oder ir anwalt vns oder vnsern rihter dem den selbe(n) abt(er)sigen ab irn
gut antwurten nun alz er mit gurtel vmbvangen ist ob daz ist daz si in auf dem selben irn gut begreiffen vnd gehaben mugen vnd schulle(n) auch wir mit
der selben menschen gut noch mit dem leib nun gut nihtes ge schaffen noch chain ordnung niht geben auch lob(en) wir obgenant(er) Graf Burchart mit samt vnsern
erben dem egenant(en) erber(n) gaistlich(en) herren prier herren von wienn sand Johans orden vnd dem haus ze Meurperig ze rehten gewern vnd schirm(en) fur all anspruch
als aigenz reht ist vnd dez landes reht ze Osterreich wer aber daz si mit reht an der selben gult chrieg od(er) anspruch gewunne(n) swaz si dez schaden
nement daz schulle(n) wir in alles aus rihten vnd wider geb(en) an alles irn schaden vnd schulle(n) auch si daz haben auf vns auf alle vnsers gut daz wir haben in dem
lant ze Osterreich von sein lehentig oder eode vnd daz vnser chauf stetig stet vnd vngebrochen beleib als an disem prief geschriben stet dar vber so geb(en) wir
den vorgenant(en) prier herren von wienn vnd dem haus ze Meurperig disen prief ze eime waren vrchund vnd ze einer ewigen vestnunge diser sach v(er)sigelt mit
vns(er)m anhang(en) vnd zu ein(er) pesser(n) stetich(ait) wellen haben wir gepeten vnser lieb herren Graf Otten vnd Graf Hainreich(en) vnd Graf Burchart(en) purgraf(en) ze Nurnberg
vnd Graf(en) ze Hardek vnd vnser herren Rud(olf) vnd Hainr(ich) von maissau vnd hern Hansen von chunring(en) daz si der sach gezeug sind mit irn anhangende(n)
insigel wann wir Graf Burch(art) der iung aigen insigel niht enhaben so chunt wir vns irer geugnuzz hie ze haben vnder vnser vater vnd herren vnd
der erber(n) herren insigel vnser prief ist geben ze Hardekk nach christes gepurd dreuzehen hundert iar darnach in dem zwai vnd funfzigist(en)
iar an duncztag nach sand colmanz tag