Ich Symon von Haras vnd ich Margret sein hausfraw vnd ich Pauwel der Durr von Haugstorf vnd ich Elspeth sein hausfraw
vnd ich Andra der chusnig vnd ich Bernhart von pawmgarten vnd alle vnser erben wir veriehen vnd tvn chunt allen den
die disen prief lesent oder horent lesen die nv leben vnd hernach chunftig sint Daz wir mit gutlichem wille mit vol
chum mut vnd mit vnser pesten freunde rat zv der czeit vmb nucz vnd gvten mocht recht vnd redleich verchauft
haben sand pancraczen Gotshaus dacz Haras sand Johans orden vnsere rechten aigene ains phunt phennig geltes daz
da leit dacz Hagendorf auf ainen lehen dar auf zv den czeiten ich vorgenant Symon waz gesezzen daz man alle iar
dient halb auf sand Jorgen tag vnd halb auf sand Michels tag vnd allez daz dar czv gehort zv veld vnd czv dorf
gestift vnd vngestift vfsucht vnd vnufsucht mit alle dem recht vnd nucz swie so daz genant sei als wir ez da vns
innen in aigenz gewer her pracht haben vmb sibenczehen phunt vnd sechczig phennig wienn(er) mvnez der wir
gancz vnd gar bericht vnd gewert sein Vnd mer auch chundent dacz Haras ist der sol des vorgenanten
chusniger vnd ich Bernhart von pawmgarten vnd alle vns(er) erben wir schullen das egenante guete dem ege
nante Gotshaus vnd dem Comdawr dacz Haras rechter schirm vnd gewer sein vnschadenleiche fur alle
ansprach nach des landes recht in osterreich Vnd wer ob daz vorgenante Gotshaus vnd der Comdawr
czv Haras vmb daz selb gvt chain ansprach oder chrieg gewunne swelhen schaden sie des mit recht nemen des
sie wol beweisen mugen den schulle wir in abetragen ganczleich vnd gar an alle wider rede da wir des
oder swa wir ez haben wir sein lebende oder tot Vnd daz dise rede stet vnd vnzerbrochen bleibe des gebe
wir ich vorgenant Symo von Haras vnd ich Pauwel der Durr vnd ich Andra der chusnig vnd ich
Bernhart von pawmgart(en) disen prief zv ainen waren geczeng diser sache besigelt mit vnser anhangen
den Insgeln vnd mit des erbr(en) chnecht h(er)n hainreichs de Rawstorf Insgel vnd mit Bernharts von
Haras Insgel die der selbe geczeng sein mit irn Insgeln Der prief ist geben nach chryst gepurt
dreiczechenhundert iar dar nach in dem vier vnd fvnfczigiste iare an sand katherin tag d(er) Junchfrawen