Ich Hainreich von Tobrentz ver gich offenwaer an disem prief allen den di in sechent. lesent. od(er) hoerent
lesen daz ich mit wol pedochtem mut. vnd mit gutleichem willen vnd auch mit rat mein(er) pesten freunt.
ze den zeiten tu ich iz wol getun maecht ge geben han dem erbn(er) gotshaus ze Altnp(ur)g mir dem vorgenant(en)
Hainreichen von Tobrentz vnd mein(er) hausvroun vroun Elspeten der got genat zu einem ebigen jartag
meines chauf aignes an zwelf phennig zwai phunt phennig geltz wienn(er) munz di gelegen sint ze Wentzeldorf.
vnd halb griendorf auf vier gestiften lechen vnd auf aim vberlent lechen ze den zeiten auf zwain gestiften
lechen gesessen ist Jans d(er) slegel vnd sein muet(er) di da von dint auf sant Jorgen tag sechs schilling phennig
d(er) vor genant(en) munz. vnd von den and(er)n zwain gestiften lechen dint Hainreich laipolt zehen vnd sechs schilling
phennig auch auf sant Jorgen tag. vnd von ainem vberlent lechen dint Chuntz(i)l wolfger acht vnd drei
schilling phennig auch auf sant Jorgen tag vnd vm daz selb gelt schullen di erbn(er) h(er)ren di di wal in dem
vor genant(en) erbn(er) gotshaus gesessen sint mir dem vor genant(en) Hainreichen von Tobrentz vnd mein(er) vorgenant(en)
hausvroun vroun Elspeten ein jartag begen all iar an dem achteten tag noch sant Jorgen tag. vnd der vor
genante phennig schol man opfern auf sant Johans alter zv ie dem jartag zehen schilling phennig. vnd schol von
den and(er)n dem p(ri)or geben zwainzich phennig dem schuelmaist(er) zwelf phennig vnd vier priest(er)n igleichem sechs
phennig dem mesn(er) vom lauten sechs. vnd den vbrigen arm lauten d(er) viert sinn vnd vierthalb schilling.
Daz di ret vnd daz gescheft stet vnd vn zeprochen peleib gib ich vor genant(er) Hainreich von Tobrentz disen
prief. zu einem waern vrchunt v(er)sigilt mit meine(m) anhangen insigil. dez ist zeug d(er) erb(er) h(er)r h(er)r Hainreich von
hakenwerch auch mit seine(m) anhangutem insigil. vnd Jorg d(er) hupalstorff auch mit seine(m) anhangute(m) insigil
Der prief ist geben da man zalt von christes gepurt. dreuzehen hund(er)t jar dar nach in dem acht vnd
funfzigistem iar an sant Michels tag . - .