Ich Jnsind der clenencz vnd ich Jans vnd Albreht sein sůn vnd all vnser erben Wir veriehen offenleich mit dem
brief daz wir mit allr vnser erben gueten willen vnd gunst mit vordachtem můt vnd auch zu der zeit da wir
es mit recht wol getun mochten stetht vnd redleich verchauft haben di aigenschaft di wir gehabt haben auf
eim hoff gelegen dacz Cwingendorf hin disser der pulka der waln gewesen ist elbleins von Cwingendorf vnd her
nach geuallen ist auf sein tocht(er) vrown dorothe vnd auf sein aiden elblein den smiden di in all von vns ze
lehen gehabt haben di selben aigenschaft des vorgenanten hofs da in gehort fier vnd fumfczik gewanten achers
vn(d) ein halber gewanten vnd ein paumgartn vnd sechs tagwerch wismad vnd ein padstuben di da dient jaerleich sechs
schilling wienn(er) phenning geltz vnd alles daz zü dem selben hof gehort ze veld vnd ze dorf versuecht oder vnsu(e)cht
wie so daz genant ist daz hab wir alles verchauft vnd geben mit allen den nuczen vnd rechten vnd dar zü gehort
dem erbern gaistlichen h(er)ren bruder Nyclasen von wildungsmau(er) di zeit p(ri)or ze wienn(er)neust(at) vnd dem con
uent da selbes vnd allen irn nachkomen vmb fumf vnd czwaiczik phunt wienner phenning der wir gancz vnd
gar verricht vnd gewert sein also beschaidenleich daz si mit dem vorgenanten hof vnd was dar zü gehort schullen
furpas ledichleichen vnd wæleich haben vnd allen irn frumen da mit schaffen mit verchaufen vnd versezen vnd
geben wem si wellen an allen val Wir sein auch vnuschuldenleich mit sampt vnsern erben der egenanten aigen
schaft ir rechter gerer vnd scherm fur anspruch als aigens recht ist vnd des landes recht in ostereich Get in
furpas dar an icht ab mit recht oder ob si mit recht icht chrieges oder anspruch dar an gewunnen von wem
daz wer daz sulle wir in alles ausrichten ablegen vnd widerchern an all ir mi vnd auch an allen irn schaden
vnd schullen si daz haben auf vns vnerschaidenleich vnd auf allem vnserm gut daz wir haben in dem lande ze
ostereich oder wo wir daz haben wir sein lebentig oder tod Vnd daz der chauf furpas also stet sei vnd vngebrochen
beleibe dar uber so gebe wir in den brief ze einem offen vrgond der sach versigelten mit vnser aller dreier an
hangenden jnsigeln der brief ist geben nach christes geburd dreuczehen hundert jar dar nach in dem sybenczigiste(n)
jar an vnser vrowentag ze der hailigen schidung