Ich Weichart der Sweinwarter vnd ich Håns der Sweinwarter sein pruder vnd all vnser erben wir
vergechen vnd tun chunt offenleich mit dem brief daz wir mit aller vnser erben gutem willen vnd gunst
mit bedachtem mut vnd auch ze der zeit da wir es mit recht wol getun mochten recht vnd redleich ver
chauft haben vnsers rechten Aygens Ain phunt wiener phennig gelts daz da gelegen ist ze Dreissenhoven auf
einem halben lehen mit allen den nuzen vnd rechten alls wir es in Aygens gewer her pracht haben daz hab
wir recht vnd redleich verchauft vmb geben vmb achzchenthalb phunt wiener phennig der wir gancz vnd
gar verricht vnd gewert sein dem Erben gaistleichen heren bruder Nyclasen von wulldingstain Maister ze
Raupach vnd dem convent gemain da selbs in vnd allen iren nach chomen furbas ledichleichen vnd vrerlahen
ze haben vnd allen iren frumen da mit ze schaffen verchäuffen verseczen vnd gewen wem si wellen an allen
irrsal. Wir sein auch vnuerchaidenleich mit sampt vnsern erben des egenanten phunt gelts in rechter gewer
vnd schirm fur all ansprach alls Aygens recht ist vnd des Landes recht in Osterreich Get in furbas dar an icht
ab mit recht od(er) ob si mit recht icht chrieges od(er) Ansprach dar an gewunnen von wem daz wer daz sullen wir in
alles aufrichten ab legen vnd wider chern an alle ir mü vnd Auch an allen iren schaden vnd sullen si das
haben auf vns vnuerchaidenleich vnd auf allem vnserm gut daz wir haben in dem land ze Osterreich od(er) wo
wir das haben wir sein lebendig od(er) tod daz der chauf furbas also stet sei vnd vngeprochen beleib daruber so
geben wir in den brief ze ainem offen vrchund der sach versiglten mit vnser payder anhangundem insigln
vnd mit vnser guten vriunt insigln Otten des Pukkendorffer vnd mit Hainreichen vnd vlreichen payd(er)
pruder insigln von durrenpach di der sach geug sind mit iren an sigln in an schaden der brief ist geben nach
Christs gepurd drevzehen hundert Iar dar nach in dem Aine vnd sibenczigsten Iar an sand Iacobs tag