Ich Conrat Jrrer fur Vnsers allergenedigisten herrn des Romischen kaysers kamer Bekenn offenlich mit dem Brief Als mir
der Edell vnd hochwirdig herr her Johanns balimbs Maister sand Johanns ordn zu Mairperg In osterreich steyr karndn vnd krain In allen vnsers
allergenedigistn herrn des Romischen kaysers erblichen lannden Mein genediger herr durch gunst vnd sund genad erwelt vnd verschriben auch eingesezt hat
ganczn gewaltigen vnd volkomen Maist(er) zu Mairperg In Osterreich steyr karndn vnd krain vnd In allen vnsers allergenedigisten herrn des Romischen kaysers
erblichen lannden des heiligen vnd hochwirdigen sand Johanns ordn In solch maynung das ich benant Conrat Jrrer mag vnd wil In meins maist(er)s
vnd stands daczue ich yecz bin also berueblich beleiben Vnd das kreucz warczaichen des wirdigen orden dieweil an mich nicht nemen als lang vnd swenn
der allmechtig got meinem genedigen herrn her Johanns balimbs Maist(er) zu Mairperg ec(etera) sein leben hie auf erden verleiczt Ich sol vnd wil auch obge
nant Conrat Jrrer dem wirdigen orden darneben getrew sein vnd alles das tun vnd betrachten nach allen meinn vermugen Was dem heiligen vnd
wirdigen orden zu nucz vnd gut komen mag Als ich dem heiligen herr sand Johanns seim wirdigen ordn auch meim sel haimstewr schuldig vnd
pflichtig bin vnd nichts suechen In dhainerlay weise noch nyemands des ze tun gestatn weder gaistlichen noch weltlichen Auch die brief des gots
sand Johanns haltn vnd tun als sy von altr herkomen vnd gehandhabt sein Auch hat mir mein genediger herr her Johanns balimbs Maist(er) zu
Mairperg ec(etera) auch sein genad prior vnd der gancz Conuent emechtlich wolversigelt vestenbrief vber den standt Maistershafft zu Mairperg In osterreich
steyr karndn vnd krain vnd In allen vnsers allergenedigistn herrn des Romischen kaysers erblichen lannden ze versorung geben Das ich nach abgang seins
leben da got lang vor sey alsdann gancz vnd vnbekumert bestat Maister zu Mairperg In Osterreich steyr karndn vnd krain Vnd In allen vnsers allergene
digisten herrn des Romischen kaysers erblichen lannden sein sol vnd bin In aller mass vnd gewalt Als er yecz ist nichts aussgenomen Mir haben auch obgenantn
Conratn Jrrer der prior vnd das gancz Conuent auch all meins genedigen herrn Johanns balimbs Maist(er) zu Mairperg ec(etera) diend so sein genad yecz hat vnd furan
gewint auch all die In dem kloster Mairperg sein vnd furan kumen nyemands aussgenomen Ir yeder In sunderhait gelub getan bey iren trewen vnd
ein an aydes stat Das sy In abgang meins genedigen herrn her Johanns balimbs Maist(er) zu Mairperg ec(etera) Mir obgenantn Conratn Jrrer das benelt
gotshaus vnd kloster Mairperg mit aller zugehorung an all widerred aufzug krieg vnd an alles letzig daczue abtretn eingeben vnd mich des gancz
gewaltig machen an all arglist vnd nyemands anndern Auch mich ganczn gewaltigen vnd bestatn Maist(er) zu Mairperg ec(etera) mein lebtag an
alles widertun sein lassen an menigklichs Irrung hindernuss vnd widersprechn nach Innhallt der brief die wir gemainander
getan vnd geben haben Alles getrewlich vnd an geuerde Ich hab auch meim genedigen herrn herrn Johanns balimbs Maist(er) zu Mairperg ec(etera)
zugezagt ob sein genad nach seinem abgang seinen dienern icht redlich schuld hinnder Im liesse das nit petlich wurd die sol vnd wil ich In
alsdann ausrichten vnd bezaln Des zu ainem warn statn vrkund Gib ich obgenanter Conrat Jrrer ze dem benantn meinem genedigen lieben herrn
herrn Johanns balimbs Maister zu Mairperg ec(etera) dem prior vnd dem ganczn Conuent daselbs den brief besigelltn mit meinem aigen anhangenden Insigl
Vnd hab darzu mit vleis gebetn Die Edln vnd vestn Wolfgagn Mullwanger zu Newharting pinhartn von Wassenreit zu Ernerstorf Vnd Wolfgagn
Teuffl zu Winnschendorf das sy Ir Insigl neben dem meinen an den brief geleyt haben doch In vnd allen Iren Erben an schadn Darumb ich mich
obgenanter Conrat Jrrer ze verpindt alles das tun vnd stat ze haltn nach Innhallt des briefs Der geben ist In Newnstat Nach Cristi geburdt vnsers
lieben herrn Tausent vierhundert vnd darnach In den Newnvndsibentzigistn Jaren An mittichen vor sand Maria Magdalen tag .