Ich Wilhelmb von Neydeckh bekenn fur mich vnnd all mein erben vnnd thue khunnt allen vnnd yeden So diser brieff furkhumbt das ich mit gueten
willen vnnd wolbedachten muet zu der zeyt So ich solhs zethuen macht het Recht vnnd redlich verkaufft vnnd zu kauffen geben habe ainen
freyn tayl am Plaßkanden mit allen den eren nuczen vnd gerechtigkaiten wie dann solhs mein vatter seliger Vnnd ich lanngs zeit bißher Inne
gehabt vnnd genossen haben. Wie dann von den durchleuchtigen hochgebornen fursten vnnd herren herren Casimirus vnnd Jorgen Gebrüder aller
der Elltesten Regierenden Marggrauen zu Branndenburg ꝛc meinen genedigen herren zu lehen ist. Demnach gib ich obgenannter Wil
helmb von Neideckh die selbigen obemelten freyen tail am Plaßkanden Vnnd auch der dritteil dasselben Plaßkanden ist zuegehörig dem hailigen
Orden sannt Johanns zu Meylberg dem Wolgebornen herren herren Johann von Rosenberg dem obristen Prior des hailigen ordens Sannt Johanns
von Jherusalem der Acht lanndt alles Behaim Osterreich Steyrmarckh Kherndten Crain ꝛc seinen nachkhomen des hailigen ordens obgenannt vmb ain
Summa gelts benenntlich dreihundert gulden vnd achtzigk gulden aller Reinisch oder seins gelts nach gebrach des Lanndes der Ich dann
gannz vnnd gar entricht vnnd bezalt bin von dem egenannten Wolgebornen herren herren Johann von Rosenberg vnd von dem hailigen Orden
Sannt Johanns obbemelt Sy mugen auch mit dem obestimbten freyen taylen hanndlen verseczen verkauffen wie Sy dann belanngt vnd verlußt
nichts außgeschlossen nach allain Irem lust vnnd bestten wolgeuallen Alls mit Irem aigen lehen guet an mein vnd meiner erben Irrung vnndertigai
denlich noch Jemants von vnnsern wegen Ich obgenannter von Neydeckh vnnd all mein erben sein auch des egenannten Wolgebornen herren
herren Johann von Rosenberg vnnd seiner nachkhomen des hailigen ordens obgemelt. des kauffs Recht gwer vnd schirmb fur all anspruch gegen
menigklichen es sey mit oder an recht auch nach vermugen meiner genedigen herren die Marggrauen vns Ires genaden lehenn recht Im lanndt
Osterreich Crainn Inen abtricht ab oder ob Inen furter krieg oder anspruch daran auferstundt oder Erwuechs es wer von wem das
welt nyemants außgeschlossen mit Recht oder an Recht. Das sollen vnnd wollen wir Inen außrichten Vnnd ob sy des ainicherlay schadn
nemen Den selben schaden wie er genannt mag werden Wollen wir Inen gannzlich ablegen vnnd widerkeren An allen Iren
schaden Vnnd sollen sy das haben zu mir vnd meinen erben auf allen vnnserm guet das wir haben oder noch gwinnen Vnuerthaidenlich Es sey
Im lanndt oder ausserhalb lanndt wo wir das haben vngeuarlich wie sein Lebenttig oder todt so soll diser brieff stät vnd vnzerbrochen
beleiben treulich vnnd vngeuärlich Der zu warer Vrkunt hab ich Obgemelter Wilhelmb von Neydeckh main aigen angeborns
Innsigel fur mich vnnd all mein erben an disen brieff gehanngen Vnnd auch von merer gezeugnus wegen hab ich mit vleiß gebetten die Wolgebor
nen herren herren Wilhelmb von Zeltking zu Siesendorff vnnd herren Friderich von Hochenfeld zu Aychstain das sy Ir aigen
Innsigel neben mein an disen brieff gehanngen haben Doch Inen Iren erben Vnnd Innsigel an schaden vnnschedlich haben. Geben zu Kasten
berg an Sonntag vor dem hailigen Gottsauffertag Anno domini Im funffzehenhundertisten Vnnd zwaintzigisten Jarem