Wir ferdinand von gottes genaden Romischer Kunig zu allen zeitten merer des Reichs in Germanien zu Hungern Behem Dalmatien Croatien unnd Sclavonien etc.
Kunig Infant in Hispanien Ertzhertzog in Osterreich Hertzog zu Burgundi Steyr Kerndten Crain unnd Wurtemberg etc. Grave zu Tyroll etc. Bekhennen offentlich
mit disem brieff unnd thuen khund allermenigclich Als sich zwischen den Erwirdigen Andechtigen unnd unnserm unnd des Reichs lieben getrewen Johann von Warttem
berg auf Strakonitz Obristen Maister des Priorats Sannct Johans Ordens in Behem ains an ainem unnd Paulsen Koldner annders tails von wegen weilunnd Joseph Koldner
Sannct Johanns Orden Brueder unnd Comenthur zu Mailberg verlaßen Erbs unnd guet Irrsal unnd zwitracht zugetragen das hie Er gedachter Paul Koldner als gemelts Koldners Brueder fur sich und
anstat seiner Sön unnd Kinder an Erbs sein vermaint Irrunng unnd strittigkhait zugetragen Derhalben sy dann von unnserm verwalter unnsers Statthalterambts Cantzler
unnd Regenten unnser Niderosterreichischen Lannden Erst fertigung gewartten unnd so vil verfaren das sy die sach zu Recht gesetzt unnd entschaid ains Urtl hierumben gehabt
Dieweil wir aber disen obgemelten strit sonnder kretliche erotterung baiden Partheyen zu guetem unnd zuverhuettung Irer weittern uncosten unnd nachtailung in der
guete verglichen unnd vertragen ze sehen gnedigclich genaigt gewest Haben wir derhalben den Erwirdigen Andechtigen Edlen unnd unnser lieb getrew Johann Bischoven zu
Wienn unnd Coadiutor zu der Newstat des claren Raths von der Dub unnd Leipa auf Ronsstat unnsers Kunigreichs Behem unnd unnsers liebsten Sons Obristen Hofmaister unnd
Lanndvogt in Ober Lausnitz Crotan von Zierotin verwalter unnsers Statthalterambts unnserer Niderosterreichischen Lannde unnd Vithalben von Kienring unnsern Raths
in sonnderhait zu disem hanndl zu Comissari geordent unnd furgenemmen unnd Inen laut unnsers bevelchs aufgeleget das sy obgemelte Partheyen oder derselbigen gesandten
unnd Gewalthaber fur sich Erfordern bester unnd hochster vleiß zwischen unnd mit Inen hanndlen sollen durch laidennliche mitl sy zuvergleichen Welcher dann geschehen unnd
auf heint dato baide tail mit verwilligung verglichen unnd vertragen sein was unnd form wie hernach volgt Erstlich solln gemeltem Paul Koldner alls unnd Iede ligende unnd
farende hab unnd guet wie die genennt werden mugen nichts außgenommen unnd unndert des von Strakonitz oder desselben Ordens Leut unnd verwandten wie die annder
seinen Brueder Joseph Koldner stunden unnd verlaßen volgen zugestelt unnd eingeantwurt werden Doch aus allerlay beweglichen ursachen Soll derselbig Koldner dem von Stra
konitz fur sein unnd des Priorats anforderung unnd zuspruch so Er von gemelts Orden wegen zu solchem guet zu haben vermaint drey Tausent gulden unnd allwegen funff
zehen Patzen fur ainen gulden zerechnen geben unnd nachvolgennder gestalt bezallen Nemblich demnach obgemelter Joseph Koldner etlich listig Schulden unnd Schuldbrieff
hinder Im verlaßen dieselben soll gedachter Paul Koldner dem von Strakonitz oder seinem verwalter anzaigen Auch wo Im brieff verhannden dieselbigen zu getrewen
hannden hinderlegen unnd ubergeben unnd zue stellen unnd alsbald solchs beschehen so soll der von Strakonitz oder Iemand dem Er es bevelchen wirdt solchs selbs bester
vleiß sollicitiern verfolgen zu hannden bringen unnd einnemen Unnd seind gemelter von Strakonitz oder desselbigen gewalthaber empfahen wirdt dasselbig soll dem Koldner
von gemelten drey Tausent gulden abgeen unnd abgezogen werden Was aber unnd wievil nach bestem furgenemmen getrewen vleiß In anverbenannten zeit unnd Nemb
lichen zwischen hie unnd Weyhennachten kunfftig Schulden nicht mochten eingezogen werden Das soll alsdann an sagennter zeit dem Koldner wider anzaigt unnd die Schuld
brieff Ihem unnd urkhunden darumben widerumben zugestelt werden damit der Koldner selbs Ime oder auf Ierhalb costen wie Ime darann bestens fuegt solchs anforderung
unnd außstendig Schulden einziehen unnd zu seinen hannden bringen mug Aber was der massen unnd gestalt wie hieoben vermelt mit eingezogen wirdt dasselbig soll der
Koldner auf geburlich Quittantz uber Iar auf Georgy des hailigen Ritters tag negst kunfftig Im viertzigisten Iar ungeverlich vierzehen tag darvor oder darnach mit barem
gelt alhie in der Stat Wienn erlegen unnd bezallen Unnd nachdem aber gemelter Koldner bey Mailperg weingarten Nemblich dreyzehenthalb viertl ungeverlich
hinder sich verlaßen Ist heuer bedacht unnd vergleicht das dieselbigen Weingartten sambt der kunfftigen fechsunge dises gegenwurttigen Iars sollen frey dem von Strakonitz
unnd dem Orden volgen unnd bleiben Darumbgegen aber soll der von Strakonitz dem Koldner dritthalbhundert gulden allwegen funffzehen Patzen fur ainen gulden zerechnen
bezallen oder an den drey Tausent gulden wie oblannt abgeen lassen unnd sollen also hiemit alle spann Irrunng unnd widerwillen unnd was sich zwischen baiden Partheyen
mit worten schrifften oder in annderweg widerwertigs unnd mißfelligs zugetragen genntzlich hingelegt veraint unnd vertragen sein Also das kain tail gegendem andern
solichs weitter mit unguetten melden der afern solle sonnder Ieder tail dem anndern nach gelegenhait seins stannds unnd wesens allen freuntlichen unnd gueten willen
erzaigen unnd beweisen Es soll auch ain Iede Parthey Irer Costhen unnd schaden so sy auf Ierhalb oder Innerhalb costens gelitten selbs haben unnd tragen aller getrew
lich unnd ungeverlich Unnd nachdem wir unns solchs vergleichung unnd verainigung hochbester massen sonnder unnser geordent ansehenlich Raths unnd
Comissari abgeredt aufgericht unnd beschlossen worden sein gnedigclich gefallen lassen So haben wir solchs brieff zwen gleich lauttennd verfertigen unnd
Iedem tail denn ainen zustellen lassen Geben in unnser Stat Wienn den anndern tag July Nach Cristi unnsers lieben herrn Gepurde funfzehenhundert
unnd Im Neun unnd dreissigisten Iar
vertrag zwischen dem von Strakonitz unnd Paulsen Koldner
Ad mandatum
Regis proprium
J(ohannes) Weisperger m(anu) p(ropria)