Wir Ienfrid von Ekhartsawe vnd ich sein havsfraw vor Elspeth vnd ich sein son Otte vnd ich sein son Chadolt vnd ich sein son hawich
vnd ich sein svn vlrich vnd ich sein tochter Margreth vnd ich sein tochter Elspeth vnd ich sein tochter Anne ver iehen offenleich an disem prif
vnd tvn chvnt allen den die disen prief lesent oder horent lesen die nv lebent oder her nach chvmftich sint daz wir Ienfrid von Ekhartsawe vnd
alle vnser vorgenant Erben mit gutem willen vnd mit verdachtem mvet vnd mit zeytigem rat vnser vrevnt vnd avch mit ir gunst den chriegch
vnd die ansprach die wir Ienfrid von Ekhartsawe vnd alle vnser vorgenant Erben gehabt haben mit den Brudern ze Loeth vmb vnsern
tayl des perchrechtes ze Herzendorf vnd vmb allez daz recht daz wir an dem vorgenantem perchrecht ze herzendorf gehabt haben lav
terleich durch got vnd durch des guten sant Iohans willen vnd avch durch vnser sel hayl ledich lazzen haben vnd ge geben dem guten
sant Iohans vnd den vorgenanten Brudern ze Loeth allez daz recht vnd alle die aygenschaft die wir Ienfrid von Ekhartsawe vnd alle vnser
vorgenant Erben an dem vorgenanten perchrech ze herzendorf gehabt haben allen irn vrvm da mit da mit ze schaffen ze verchawfen vnd ze
ver setzen vnd geben swem sei wellen vnd verzeyhen vns allez des rech~tes~ vnd aller der ansprach die wir an d~em vorgen~antem perchrecht ze
herzendorf gehabt haben also daz wir vorgenanter Ienfrid von Ekhartsawe vnd alle vnser vorgenant Erben nimmer mer chain ansprach noch
chayn vordervnge avf daz vorgenant perchrecht ze herzendorf ge~winn~en Dar vmb habent vns die vorgenanten Bruder ze Loeth ge
geben ayn fuder weins vnd aynen mvtt~e~ waitzes vnd habent vns des ge wert also daz wir die vorgenanten Brudern ze Loeth vmb daz
vorgenant perchrecht ze herzendorf furbaz nicht ze vordern haben dar vber daz div sache vnd disev tat stet vnd ganz vnd vnzerprochen
be leibe des gebe wir vorgenanter Ienfrid von Ekhartsawe disen prief zu ainer vestenvnge vnd zu aynem zevg dirre sache versigelt mit
meinem Insigel mit den gezevgen die her nach geschriben sint Daz ist her Chalhoch von Ebersdorf her Chvnrat von puchperch her
Otte von haselawe her chadolt von haselawe her haynreich von haselawe her Gotfrid von Wildungesmauer her stephan der
stuchsle vnd ander piderb levte den die sache wol chvnt ist Diser prief ist ge geben da von Christes gebvrt waren Tawsent Iar zway hun
dert Iar In dem siben vnd newnzigstem Iar An dem Achten tag nach dem perchtage in der stat ze Wienne