Ich Meinhart vnd ich Vlreich vnd ich Jacob hern Tyemen svne ab dem perge tůn chunt allen den die disen prief sehent oder hoerent lesen die nu lebent vnd her nach
chumftich sint daz wier div dreu lehen vnsers rehten Aygens daze Eybensprunne dev wier gehabt haben in rehter Aygens gewer von vnsern swestern so die leut zeden zei
ten auf sazzen hietz der Amman hietz des Ammans svne heinreich des ammans svne Meinhart des ammans prueder chunrat Meinhartes svne daz wir di selben aygenschaft
mit guetleichem willen aufgegeben haben dem erben herren sant Johans den pruedern vnd dem hause daze wienen durch Got vnd durch vnser sel willen vnd vns ver
zigen haben alles des rehtes des wir furbaz oder vnser nach chumftig erben von dem selben guete her nach gewarten soldten vnd mit allem dem reht do man sich rehtes aygens
mit verzeihen schol nach des landes reht vnd haben auh gelubt Jch der vorgenante Meinhart vnd ich vorgenanter vlreich vnd ich vorgenante Jacob vnd vnser ohaim her
perhtolt von Altenlengenpach vnd her dietmar der chozphaimer vnser freunt haben gelubt den vorgenanten pruedern vnd den erberen herren des heligen ordens von
sant Johans daz wir in schern vnnschaidenleich vber daz vorgenant guet nach des landes gewonhait vnd vund wier aygens ynligels nicht gehabt haben so hab
wier gepeten vnsern ohaim hern perchtolten von altenlengempach durch pezzer sicherhait vnd vrchund der vorgenanten sache daz er hat versigelt disen prief
mit seinem ynligel vnd sint des gezeuge die her nach geschriben sint her Otto der wol her herdegen des wolen prueder her dietreich der huertloch her chun
rat der dremel her chunrat der raichalmer her Gotfrid der hagenprunner Fridreich chůnleins svne Otto chůnleins svne chunrat chůnleins svne leutold
von strůbleinsthorf perhtold der wolf chunrat von strebleinsthorf seifrid des ammans sone von Eybensprunne vlreich von Olbrensthorf vnd ander
erber leut genuge den di sach wol chund ist diser prief ist gegeben do von Christes geburt was er gangen Tausent jar drehundert jar in dem dritten
jar des Eritags vor den chottembern in der vasten.