Ich Otte von Stralek vergiech vnd tvn chvnt allen den die disen Prief lesent oder horent lesen die nv lebent vnd hernach
chvnftich sint. Daz ich mit meiner naechsten frevnt rat do ich lediger man was vnd avch zv der zeit do ich iz wol getvn
mocht recht vnd redleichen awf gegeben han sand Johans havs ze Wienne Jn der Cherner strazze vnd der samnvng
gemayn des selben havses ain aigenschaft aines weingarten des ain viertail ist vnd der da leit ze Grintzing an dem
Bavs daz da ist Chvnrates hern Liephardes svn. vnd den ich recht vnd redlichen verchawft han den erbern mannen
Weinharten dem Goltsmit pvrger ze Wienne vnd seinem prvder Levbmannen hern Chvnrates svnen des Strauchen
vnd allen irn erben. also beschaidenleichen daz si fvrbaz ewichleichen von dem selben weingarten dienen svln dem vorgenan
ten havs sand Johans vnd der samnvng gemayn des selben havses ze rechtem Pvrchrecht alle jar an sand Mychels
tage Sechs Wiemer phenning an alle wider rede. vnd dar vber dvrch pezzer sicherhait so setz ich mich ich Otte von
Stralek vber die aigenschaft des vorgenanten Weingarten sand Johans havs in der Cherner strazze ze Wienne
vnd der samnvng gemain des selben havses ze rechtem schern fvr alle ansprach als aigens recht ist vnd des landes
recht ze Osterreich. vnd gib in dar vber disen Prief zv ainem sichtigen vrchvnde vnd zv ainem offen gezevg vnd
zv ainer ewigen vestnvnge diser sache versigelten mit meinem Jnsigil. vnd sint avch des gezevg Her Dietreich von
Wolfkerstorf Her Lapot von Valkenberch Her Otte von Pylichdorf. Lveger von der Haselawmptz Fridreich sein prve
der. Hainreich der Lang. Chvnrat Ortolf der Hvetstoch. Marchart der vorsprech vnd ander frvm levte genvech den dise
sache wol chvnt ist Diser Prief ist geben ze Wienne do von Christes gebvrt waren ergangen Drevtzehen hvndert
jar Jn dem Fvnfzehenten jare dar nach des naechsten svntages vor sand Marien Magdalen tage