Ich Hainreich von paden ~und~ ~fraw~ Diemut sein hausfraw wir veriehen und tun chunt allen den di disen
prief sehent oder horent lesen di nu sint oder her nach chunftig werdent / daz wir mit verdachtem muet und mit
gesamter hant und mit guetlichem willen aller unser erben ze den zeiten do wir ez wol getun mohten haben ge
geben unserm sun Hainreichen vier phunt geltez di da ligent ze wosendorf auf eim lehen da sizent wehdusten hol
den duff daz unser rehtez aigen ist wir haben auch im gegeben einen weingarten der da leit vor der chirchen ze
paden an dez herzogen perg der da haizzet der chaufweingart der da dient einen eimer weinz ze perchreht
dem herzogen und ist der selbe weingart gar wol funfcz phunt wert / di vorgenanten vier phunt
geltz ze wosendorf und den vorgenanten weingarten den chaufweingarten geb wir ich der vorgenant Hain
reich von paden und ich sein vorgenante hausfraw fraw Diemut unserm vorgenantem sun Hainreichen
daz er ses verchaufen versezen mag und allen seinen frum da mit da mit gescaffen mag / Auf di waz daz
er da mit priester sol werden / Dar umbe daz disiv sach stet und unzeprochen beleibe gib ich der vorgenant
Hainreich von paden meinem vorgenantem sun Hainreichen disen prief zu einem offen urchund diser sach
versigelten mit meinem anhangendem insigel und mit hern Hainreiches insigel von wehenstain und mit hern alber
insigel von stetin / Dver sach ist gezeug her weydel der preuzzel ze paden Hainreich der hutter her
Hainreich von gultz des alt und ander piderb leutte genueg den disiv sach wol chunt ist / Diser prief
ist gegeben ze paden do von christes gepurt wurden ergangen dreizehen hundert iar dar nach in
dem sechze und zwainzigistem iar / an sand Thomas tag