Ich Ortolf von Gærenwerde vnd ich Agnes sein Hausvrowe Wir veriehen vnd tůn chunt allen den die disen
brief lesent oder horent lesen die nv lebent vnd her nach chvnftich sint daz wir mit alle vnserer erben gvten willen
vnd gvnst mit verdachten mvte vnd mit gesamter hant nach vnsern pesten frevnde rat zv der zeit do wir ez wol
getvn mochten recht vnd redelichen verchauft haben vnsern rechten aygen daz wir gehabt haben an ahtzich fvnf phvnt
wiener phenninge geltes die da ligent datz Nydernlach vnd ze obern lach vnd swaz dar zv gehozet mit allem dem
nvtze vnd rechte als wir die selben gvlte vnversbrochenlichen in aygens gewer her pracht haben vmb syben vnd fvnfzich
phvnt phenninge wiener mvntze der wir gar vnd gentzlichen verricht vnd gewert sein den erbern gaistlichen levten
prvder Otten dem Gotzenbechsen prvder Chvnraten von Havspach vnd prvder Nyclasen von wildvngesmavr sand Ians
orden in der cherner strazze ze wienne vnd dem selben orden fvrbaz ledechlichen vnd ewiclichen ze haben vnd allen iren
frvmen da mit zeschaffen verchavffen versetzen vnd geben swem sev wellen als in daz aller peste chvm vnd fvege an allen
irrsal also daz wir vnd vnser erben fvrbaz dechainen chrieg noch dechain ansprache dar avff nimmermer gehaben svllen
vnd durch pezzer sicherhait so seczen wir vns ich vorgenanter Ortolf von Gærenwerde vnd ich Agnes sein havsfrowe
vnverschaidenlichen mit sampt vnsern erben den vorgenanten drin herren prvder Otten dem Gotzenbechsen prvder Chvn
raten von Havspach vnd prvder Nyclasen von wildvngesmavr vnd irem orden vber die vorgenanten an ahtzich phenninge
fvnf phvnt geltes ze rechtem gewern vnd schirm fvr alle ansprache als aygens recht ist vnd des landes recht ze
Osterich vnd swaz in fvrbaz mit rechte dar an abe get daz svllen sev haben vnverschaidenlichen avff vns vnd avff allem
vnserm gvt daz wir haben in dem lande ze Osterich wir sein lebenig oder tod vnd daz der chavf vnd dise rede
fvrbaz also stæte sei vnd vnzerbrochen belibe dar vber so geben wir in disen prief ze ainem offen vrchvnde vnd gezevge
vnd ze ainer ewigen vestvnge versigiltn mit vnserm insigel vnd mit vnsers prvder insigel Herims von Gærenwerde
der diser sache gezevg ist mit seinem insigel vnd ander erber levte genvch den dise sache wol chvnt ist diser prief
ist geben ze wienne nach christes gebvrt drevtzehenhvndert iar dar nach in dem syben vnd dreizzigistem iar an vnser
vrowen tage der liechtmesse