Ich Håns von Paspach. Vergieh vnd tůn chunt allen den die disen brief lesent oder horent lesen
die nu lebent vnd hernach chunftig sint. Daz ich mit aller meiner erben guten willen. vnd gunst. mit bedachtem
mut. vnd nåch meiner pesten freunt råt. zu der zeit do ich iz wol getůn mocht. stæte vnd vestleich ze rechtem
wider chæuffel gegeben hån. Dem edeln herren. Pruder Hæinreichen. Gråf von Schawenberch obrister Maister
Sant Johans orden. ze Tæutschen. vnd Commiteůr. dacz Sant Johans. in der Chærnerstrazze ze wienne. vnd auch
dem selben haus. Sant Johans. in der Chærnerstrazze. meine rechten aigen. an sehs phenning. sehs schilling
wienner phenninge geltes Gruntrechtes der funf schilling geltes. Gruntrechtes. ligen auf Hæinreichs haus dez
wurffels. vnd auf einem Gårten hinden dar an. der alles gelegen ist vor Stuben tor ze wienne zenæhst
Hæinreichen. dem Sælzer. vnd die man auch alle iår dient ze drin zeiten ein iår. funfzig phenning. an
Sant Jorgen tåg. funfzig phenning an Sant Michels tåg funfzig phenning. ze weihennåchten. vnd
vier vnd zwainzig phenning geltes. auf Andres haus. dez Chramer. daz da leit hinden dem Chlewen
mårcht zenæhst der Lebinne der Pælehinne. die man auch alle iår dient an Sant Michels tåg. ze rechten
Gruntrecht. Die vorgenånten. an sehs phenning. sehs schilling wienner phenning geltes Gruntrechtes
hån ich dem egenånten edeln herren. Pruder Hæinreichen. Gråf von Schawenberch. vnd dem vorgenånten
haus. dacz Sant Johans in der Chærnerstrazze ze wienne. vnd allen irn nåch chomen stæte vnd vestleich
ze rechtem wider chæuffel gegeben. in alle dem mut vnd recht. als ich si an Gruntrechtes gewær her pracht
hån. vnd als si von alter her chomen sind. fur die funf schilling vnd viertzehen phenning wienner munze
geltes Gruntrechtes. die si mir da wider gegeben håbent. auf dem Gårten. der wæln Chunrats dez Chnelt
wericher gewesen ist. der da leit vor Stuben tor. Es sol auch der vorgenånt edel herre. Pruder Hæinreich
Gråf von Schawenberch. vnd die herren gemåyn. dez haus dacz Sant Johans in der Chærner strazze. vnd alle ir nåch
chomen. mit den egenånten an sehs phenning. sehs schilling wienner phenning geltes Gruntrechtes. furbaß chæufleich
vnd vræileich. allen irn frumen schaffen. verchæuffen. versetzen. vnd geben swem si wellen. an allen irrsal. Vnd dar
uber durch gezeuchnusse so setz ich mich vorgenånter Håns von Paspach aines schadenleut mit samt meinen erben
uber die egenånten. an sehs phenning sehs schilling wienner phenninge geltes Gruntrechtes. dem obgenånten edeln
herren. Pruder Hæinreichen. Gråf von Schawenberch. vnd den herren gemåyn dacz Sant Johans in der Chærnerstrazze
vnd allen irn nåch chomen. ze rechtem gewær vnd schirm fur alle anspach. als aigens vnd Gruntrechtes recht ist. pond
der stat recht ze wienne. Wær aber daz si mit recht. an der selben gult icht chrieges oder anspach ge
wunnen. swaz si dez schaden nement. den sol ich in alles aus richten vnd wider tůn. an allen. irn schaden. vnd
suln auch si den haben. auf mir vnd auf meinen erben. vnd auf allem vnserm gut daz wir haben in dem
Lande ze Osterreich. wir sein lebentig oder tode. Vnd daz disiu sache furbaz all stæte vnd vnzerbrochen beleibe.
dar vmb so gib ich in disen brief zü einem wårn vrchunde vnd ze einer ewigen vestnung. diser sach versi
gelt mit meinem Infigel. vnd mit dez Erbern Luter Infigel. hern Vlreichs bei den Minnern Prudern. der
diser sach gezeug ist mit seinem Infigel. Diser brief ist geben ze wienne. nåch christes gepurd dreutzehen
hundert iår. dar nåch in dem funf vnd viertzigisten iår. dez nåchsten Suntags. vor dem Palm tåge.