Ich Vlreich der Chraͤun vnd ich Perhtey sein hawsfrowe vnd ich Vlreich ir baider sun. Wir vergehen vnd tuͦn chunt Allen de
die disen brief lesent oder hoͤrent lesen. die nu lebent vnd hernach chuͤnftich sint. Daz wir mit vnser erben guͦten willen
vnd gunst mit verdachtem muͦt vnd mit gesamter hant zuͦ der zeit do wir es wol tuͦn mochten. vnd mit vnser
Durchlewtigen herren des erbern Gaistlichen herren Pruͦder Ernsts des Ochsen zuͦ den zeiten Comitewr datz dem Tewt
schen haus ze wienne. Verchauft haben vnsers rechten Chaufguͦtes vnsern hof gelegen ze O̊stertvn da sechs
vnd sibentzig Jauch aechers vnd ein halbs tag werich wismades in gehoͤret vnd swaz dar zuͦ gehoͤret ze velde
vnd ze dorf es sei gestift oder vngestift versuͦcht oder vnversuͦcht swie s den genant ist. da man alle
iar von dient den gaistlichen herren datz dem Tewtschenhaus ze wienne drey wienner phenninge ze weyhennahten
ze rechtem Purchrecht. vnd hincz Ebreinstorf auf einen alter zwaͤlf wienner phenninge ze belger stewer
Nicht mer. Den vorgenanten hof vnd swaz dar zuͦ gehoͤret als vor geschriben ist. haben wir
recht vnd redleich verchauft vnd geben mit alle dem nutz vnd recht. als wir in in Purchrechtes gewer
her pracht haben. vmb fuͤnf vnd fuͤnfczich phunt wienner phenninge. der wir gar vnd gaͤntzleich ge
wert sein. Dem erbern gaistlichen herren Pruͦder Chuͦnraden von Hawspach zuͦ den zeiten Comitewr des
haus ze O̊den sant Johans Orden. vnd Pruͦder Otten dem Torzempelschen des selben Ordens. vnd sant
Johans Orden. fuͤrbaz ledichleich vnd freyleich ze haben vnd allen irn frumen da mit ze schaffen ze ver
chawffen versetzen vnd geben swem si wellen an allen irrrsal. vnd sein auch wir ich Vlreich der Chraͤun
vnd ich Perhtey sein hawsfrowe vnd ich Vlreich ir baider sun. vnd alle vnser erben. muͦt scheidenleich des
vorgenanten hofs. vnd alles des daz dar zuͦ gehoͤret als vor geschriben ist. der egenanten Gaist
leichen herren Pruͦder Chuͦnrat von Hawspach. vnd Pruͦder Otten des Torzempelschen. vnd sant Johans
Orden recht gewern vnd schirm fuͤr alle anspruch als Purchrechtes recht ist vnd des landes recht ze
Osterreicht. Wer aber daz si vmb recht an dem selben hof vnd an alle des vnd dar zuͦ gehoͤret icht
Chrieges oder anspruch gewunnen. swaz si des schaden nemen. den suln wir in alles aus richten vnd wid(er)
chern an allen irn schaden. vnd suln auch si des haben auf vns vnser aydenshaft vnd auf allem vnserm
guͦt daz wir haben in dem lande ze O̊sterreich. wir sein lebendich oder tode. Vnd daz diser chauf
fuͤrbaz also staͤte vnd vnzerbrochen beleibe. Dar vmb so geben wir in disen brief zuͦ einem warn
Vrchuͦnde vnd zuͦ einer ewigen vestnunge diser sache versigilt mit vnserm Insigiln. vnd mit des haus
Insigil der gaistlichen herren datz dem Tewtschen haus ze wienne. vnd mit meins Pruͦder Insigil hern
Pilgreims des Chraͤunen. vnd mit Chalchs Insigil von Ebersdorf hern Otten sun. mein vorge
nanten herren veter. die diser sache gezeuge sint mit irn Insigiln. Diser brief ist geben ze
wienne nach Christes geburt Dreytzehen hundert iar dar nach in dem zway vnd fuͤnfczigisten iar
an sant Gregorigen tage.