Ich Andre der Hütstokch vergich vnd tün chunt allen den die den brief lesent oder horent lesen die nü lebent vnd hernach
chumftig sind daz ich mit aller meiner erben gütem willen vnd gunst mit wolbedachtem müt zü der zeit do ich es wol
getün mocht vnd mit meins pergherren hant des erbern geistlichen herren prüder Hannsen sand Johans ordens in
den zeiten comitewr der zwayr hewser ze sand Johans in der chernerstrazz ze wienn vnd ze laa verchouft han meins
rechten veterlichen erbgüts meinen weingarten gelegen ze grintzing in der langen lüzzen des fümf virtayl sint
vnd haizzet der slügler genewst hern hannsen weingarten von syrnd dainen von dem egenanten weingarten alle
iar dint dem vorgenanten haws datz sand Johans in der chernerstrazz ainen emmer weins ze pürchrech vnd ayns
phennig ze vovericht vnd der pharchirchen datz der heyligenstat ein halbsphunt wienner phennig für den zehent
vnd Jomans säligen des grillen chinder newn phunt wienner phennig ze pürchrecht vnd nicht mer denselben
weingarten han ich recht vnd redleich verchouft vnd geben mit allen den nützen vnd rechten als ich in vnuerstoz
chenleich in erbrechts gewer herpracht han vnd als er mit alter herchomen ist vmb zwayhundert phunt wienn(er)
phennig der ich gantz vnd gar gewert pin vnd sücht ouch derselbe weingart chain tayding dem erbn mann annteln
dem schrötel datz der heyligenstat vnd seinen erben oder wem er denselben weingarten den er vmb sein ledigs
varmügüt gechouft hat schaft macht oder geit fürbas ledichleich vnd freyleich zehaben vnd allen iren frumen damit
geschaffen verchouffen versetzen vnd geben wem si wellen an allen inual vnd pin ouch ich obgenanter Andre der
hütstokch vnd all mein erben inuerstozzenleich des vorgenanten weingartens des egenanten anntels des schrötels
vnd seiner erben oder wem er in schaft macht oder geit rechte gewern vnd schirm für all ansprach als pürchrechs
recht ist vnd des lannds recht ze öster(reich) wer aber daz in fürbas an demselben weingarten icht chriegs oder an
spruch auferstünd von wem daz wer mit recht swas si des schaden nement das süllen wir in alles ausrichten
vnd widerchern an allen iren schaden vnd süllen ouch si das haben auf vns vnd auf allem vnsern güt daz wir
haben in dem lannde ze öster(reich) oder wo wir es haben wir sein lebnig oder tod vnd daz der chouf fürbas also
stet vnd vngebrochen beleib daruber so gib ich obgenant(er) Andre der hütstokch für mich vnd für all mein erbn
in den brief zü einem waren vrchunt der sach versigiltn mit meins anhangunden insigil vnd mit des vorgn(anten)
perkherren insigil prüder hannsen comitewr datz sand Johans vnd mit des erbn mans insigil seifrids des
schifers von der heyligenstat die ich des gepeten han das si der sach gezeugen sint mit iren anhangunden
insigiln der brief ist geben ze wienn nach christi gepürt drewtzenhundert iar darnach in dem drew vnd
achtzigistem iar des nachsten freytags nach dem phinchtag