Ich Haidel der Gastner zu den zeiten des hochgeborn fursten meins genädigen herren
herzog wilhalms etc(etera) Osterreich etc(etera) kamerer vergihe offentlich mit dem brief vmb
den weingarten gelegen ze Ruez an dem wolfeßperg der ein halbes Jauchait
vnd haisset der Laimbater genant Jannsenn weingarten da spann den ich ver
kauft vnd geben han Vlreichen dem pecken dacz sand veit vnd frawen katrein
seiner hausfrawn vnd ir baider Erben nach des chaufbriefs sag den ich In mit
des edeln vnd gestrengen herren insigil prueder haingen von mehing
zu den zeiten comenteur dacz zwaen kirchen dacz sand Johans in der kernerstrazz
ze wienn vnd ze laa besigelten daruber gegeben han das ich vnd all mein
Erben vns da gegen demselben prueder haingen von mehing vnd gegen allen
seinen Nachkomen verluht vnd verpunden haben vnd verpinden vns gegen
In mit dem brief also ob die waer das In von des kaufbriefs wegen des
weingarten chaufbriefs furbas icht chriegs oder anspruche gewunnen von
wem das waer das ich vnd mein Erben In das alles ablegen sullen an allen
iren schaden vnd sullen si das haben auf vns vnd auf allem vnserm gut das wir
haben in dem lande ze Osterreich oder wo wir es haben es sey lebendig oder
tod Vnd wand ich obgenanter haidel der Gastner mein aigen insigil zu der zeit
pey mir nicht gehabt han darumb so gib ich In den brief zu ainem warn vrkunde
der sach besigelten mit des erbern insigil Jorgen des fläming vnd mit des erbn
mannes insigil Vlrichs des meyssaerter zu den zeiten des hochgeborn fursten herzog
Albrechts obristen Amptman in Osterreich die ich des vleissiclich gepeten han das
si der sach gezeugen sind mit irn insigeln In an schaden darvnder ich mich mit
meinen trewn aigen verpind alles das stet zehaben das vor an dem brief ge
schriben stet der geben ist nach christi gepurd dreuzehenhundert Jar darnach
in dem aht vnd Newnzigistem Jar des naehsten sambtags nach gotleich
nam tag