Ich Segemut Hertel Comter zwm heylig(en) leych(n)am zw Breslaw
des Ordens sant Joha(n)ns von irh(usa)l(e)m vn(d) wir hynoch geschreb(e)n bruder
Bruder Johanes prior Bruder petrus Schaffer myt eyntrechtiger vor=
willuge des ganzen conuents Bekene(n) myt dyßem briffe das wir ent=
phangen haben eyne Su(m)ma geldis guter vng(er)ischer goldyn von der
Togutsamen frawen vrsula Schultissynne zw kewsen dorvmb vyer
mark yerliches zynses zw vnserym Syechhawse vor dy kranken
Bruder vn(d) nicht alleyne vor dy bruder dy do legerhafftig seyn sunder
ouch vor dy dydo sust swach seyn alders halbe ader sust gebrechlich
seyn das den allen myt sulchen gelde zwhulffe komen werde Jdoch
myt sulchem vnderscheyde das wir der genanten frawen vrsule zw
yrn lebetagyn zw leyprenten geben sullen auß den vyer marken off
alle Quatemp(e)r eyne marg heller anzwhebyn noch den nehsten pfingst(e)n
vn(d) also vort alle yor yerlichen Dorvmb zo globe(n) wir vor vns vnde
vor vnser nochkomenden bruder bey gutty trawen vn(d) gewissen der
obengenant(e)n frawen zw geben von allen vnsern guttern dy vorgenate
Zal heller gutt(er) ganghafftiger monze off dy zeyt dy do oben benant
ist vn(d) zw yrn lebetagyn vnvorzogelich Das wir ader sulcher guttot
nicht vndangkam vfunden werden zo welle(n) wyr ouch vmb gotis willen
vn(d) vmb yrer vn(d) yres elichen manes Nickel Sulczen Schulzen zelen
selikeyt willen noch yrer abescheydunge halden vn(d) begehen alle yor
eyne yorige zeyt myt vigilien vn(d) meßen vn(d) nemlich sy teylhafftig
sullen werden zw ewigen gezeyten der vigilien vn(d) meßen dy wyr off
alle Quatemp(e)r vor dy mane besundern vn(d) ouch vor dy frawen be=
sundern vn(d) dorzw allyr vigilien vn(d) meßen dy wyr begeh(e)n das ganze
yor vor alle vn(d) itgliche dy do gutteter vnsirs ordens gewest seyn des
zw eyner sicherheyt hab(e)n wyr vnsirs Conuents Jngsigil an dyßen briff
gehangen Gegebyn noch gotis geburt vyerzenhundert yor vn(d) dor
noch ym ach vn(d) newenzigstyn yore am tage des heyligen Vrbani
Bobist vn(d) merterers