Wir Ratmanne der Stadt Breslaw vonn koniglicher gewalt vonn Behmen haldende vnnd vorwesende die Howbtmanschafft zu
Breslaw Bekennen offintlich mit disem briue vor idermenniglich das vor vnns gestanden sein die Erwirdigen Andechtigen her Adam
adamus der heiligen schrieffte lerer vnnd prediger prior Wilhelmus schaffer vor sich selbist vnd In namen vnnd vollermacht des
gantzen Conuents vnnd klostirs zu sandt dorothean allhie mit dem Erschafftigen meister Valentino Rotze Stadtschriber irn zu disin sachen
gekornem vormunden wolgesunt leibes vnnd synnen mit wolbedochtem mute vnnd haben vffgericht recht vnnd redelich In einem rechten
kauffe dem Achtparn wirdigen hern Comptor vnnd der gantzen samlunge des hawses zcum heiligen leichnam sancti Joannis Jerosolimitani
ordenns funff marg geldis ierlichs vnnd freyes zcinses die das gedochte Conuent zu sandt dorothean gehabt hat In vnd vff deme
dorffe vnnd gutte Hermansdorff Im Breslischen gebite gelegen tzugebin vnnd tzugelden ierlichen denselbin zcins drittehalbe marg
vff Walpurgis vnnd drittehalbe marg vff Michaelis bey der pfandunge Vnnd mit allen rechten freyheiten guldetagen pfandungen
vnnd mechten als die genanten vorkewffer solich funff marg geldis zcins biszher haben gehabt gehalden vnnd besessen Also vnd
In gleicher weize Mit allen denselbin rechten freyheiten guldetagen pfandungen vnnd mechten Sullen awch die gedochten der herre
Comptor die gantze samlunge obgemelts Conuents zcum heiligen leichnam vnd ire nochkomen dieselben funff marg zcins furbas
haben halden vnnd noch lawte vnd awsweisunge des alden brieffs so vormols drubir gegebin In widerkauffs besitzin vnnd nicht anders
Demselbin kauff vffceubunge vnnd allis das vorgeschriben stehit haben wir stete vnnd ganntz vnnd bestetigen die von koniglicher
gewalt von Behmen der wir geprauchen mit dem koniglichen Ingsigel der landlewte des furstenthumbs zu Breslaw dasto ist zcw
lehen vnnd zu sagen vnnd an disen brieff gehangen Geben zcw Breslaw am Mittewoch noch dem Sontage Cantate Noch Cristi
gepurt funfftzehenhundirt darnoch Im sibenden iare dobei sein gewest die Edeln Georg Czeidlitz vor der Grosse Nickel Rymbak
hanns koltsch lenhardt Skopp Alexius Banke hanns harnigk Jeronimus harnigk vnnd hantze dottener vnsers gnadigen hern konigs
vonn Behmen Mann Vnnd Bernardinus Schelnschmydt vnnser obgenanten Ratmannen vnnd gemeiner Stadt Breslaw Cantzley
Schreiber der disen kegenwortigen brieff gehabt hat In befelhunge

Ond(em) Comptoris et Conuentus ad Corpus(christi)
super quinq(ue) marc(is) cen(sus) in hermansdorff