Ich Johannes doringk bruder deß ordens sant Johannis vonn Jher(usalem) vnnd Compter deß
hawßes zwm heiligenn leichnam vor Breßlaw Bekenne offintlich ynn dyßem
brieffe daß vor mich komen ist Mathis koler als distler deß ordens vnserß
zwm Newdorffe vnn hot bekanth vor gehegetem dynge do Jorge Otthe
scholtz zwm Newdorffe mit denn nachgeschrebenn scheppenn Nickel vßler
Bartsch han Vrban kyttel Pawl hoffmann Gyn(ter) lange do selbist dasz
dyngk soßen von daß her mit meyner gunsth vnn willen vorkawfft hot
dem Prior vnn seynen brudern deß hawßes zwm heiligenn leichnam vor
Breßlaw off zeynem erbe iiij margk heller So vnn gelobet der obgnante
Mathis koler vor sych vnn vor zeyne nochkomelinge zcw gebenn eyn Jhar off
Bartholomei dem Prior vnn zeynen brudern vnnd nw nehste zw kommen
off denn zelbigen tagk ann zcw hebenn vn ffort alle Jhar ierlich off denn
genantenn tagk byß her aber zeyne nochkomelinge dy gnantenn iiij margk
vormugenn abczulosenn vnschedlich vorseßenn tzinsenn Vnnd ab der gnante
Mathis koler ad(er) zeyne nochkomelinge zulichen zcins off denn bestymptenn
tagk nicht gebenn worde zo magk der Prior sich mit holffe deß scholtzenn
lossenn pfendenn vnnd mit dem pfande thwn gleych ab alle recht
darob sych ergangen hettenn Deß zwm eynen worhafftigenn bekentniß
hab ich ob gnanter Compter deß hawßes Ingesigel ann dyßenn
bryff wyssentlich lossenn hengenn Gethan an dynstage noch
Stanislai Noch Cristi geburth Tawsenth ffunffhundert vnn ym
achtenn Jhar