Ich pruder Niklas von gotes genaden prior vnd alle pruder gemainkleich ze Furstenueld sand Augustins orden Bekennen fur vns vnd alle vnser nachchomen daz wir den hernach geschriben spruch schiedung vnd berich
tung die der Erwirdig gaistleich her pruder Ortolf von Wildungsmavr maister ze Mawrwach sand Iohans orden geordent gesprochen vnd getan hat zwischen den erbern gaistleichen pruder Iohansen dem Comdewer seim
conuent vnd allen prudern desselben sand Iohans orden ze Furstenueld auf ainen tail vnd zwischen vns vnd den egen(anten) vnsern nachchomen Augustiner auf den andern tail anbleiben stet vnd vnzerbrochen hal
ten wellen von wort ze wort als wir des vormals vns verbvnden haben mit vnserm offen brief den er von vns hat Derselb sein spruch vnd schiedung stat von wort ze wort also Ich pruder Ortolf von
Wildungsmavr maister ze Mawrwach Bekennen mit disem gegenwurtigen brief als die Ersamen vnd gaistleichen pruder Niklas prior vnd alle pruder gemainkleich ze Furstenueld des ordens der Eremiten
sand Augustins vmb ir sache vnd widerleg die si tun sullen die erbern vnd gaistleichen dem Comdewer vnd dem Haus sand Iohans orden ze Furstenueld vmb alle die schaden dew si ir pfarr daselbs ge
wunnen mag an allen chvnftigen zeiten von wegs etleiches newen ganczleich mit ganczen trewen vnd an alle arge list alles geuardes hinder mich gegangen sind Also das ich daruber sprech
daz si daz ganczleich stet halten wellen vnd sullen als si sich des hinder mich verbvnden habent mit iren offen briefen Nu hab ich alle gerechtigchait in got angesehen Vnd mein gnedig herren
die hochgeborn fursten die Herczogen von Osterreich die des closters sand Augustins orden Stiffter sind Vnd den erbn herrn herrn Fridreichen von Wallsee Lantmarschalkch in Osterreich mit samt
andern herrn Vnd hab mit wol bedachtem mut vnd mit gvter betrachtung nach meins trewen gesprochen vnd sprich auch mit disem brief da bey es ewikleichen beleiben sol an geuar Von
erst sprich ich daz daz Gotshaus sand Iohans orden ze Furstenueld daz die pfarrchirchen ist bey allen iren alten vnd chvnftigen rechten beleibn sol gegen in an alle ingriff vnd hindrung des
chlosters sand Augustins orden als ander pfarr in andern steten vnd in dem pistum von Salczburg recht habent da chloster liggent So ist daz daz chloster sand Augustins orden auch alle
die recht sol haben als ander ir chloster die auch in steten vnd in dem pistum von Salczburg liggent da pfarr inne sind Darnach so sprich ich daz die vorgen(anten) gaistleichen pruder Niklas vnd
alle pruder gemainkleich ze Furstenueld sand Augustins orden den obgen(anten) dem Comdewer vnd dem Haus sand Iohans orden ze Furstenueld daz die pfarrchirchen ist acht phvnt geltes ewigs
gvtes dientschaft auf dem lande auf behaubten gvlten vnd gvt vnd nicht auf vberland chaufen vnd geben sullen wie si daz chaufent in dem land ze Steyr vnd sullen des tag habn
von dem tag vnd der brief geben ist eynen gancze Iar nach anand Vnd sullen in die siben iar alle iar iarikleich dienen raichen vnd geben acht phvnt phenning ze rechtem dienst ze
zwain tagen in dem iar ze sand Michels tag vier phvnt vnd ze sand Georgen tag vier phvnt phenning ze geben Vnd wellhe iars daz ist daz si in ain phvnt gelts chaufent als vorgenant
ist vber daz Iar sol in den acht phvnt phenning gelts herab gen vnd vallen an ains phvnt phenning ze dienen die siben iar vnd wellhe iars daz wär vnd zu welhem dienst tag si
in iren dienst nicht gebent als vorgenant ist So hat der hochwirdig furst der Pischof von Salczburg oder sein Erczpriester an seiner stat vollen gewalt in daz singen vnd allew andrew gotz
recht ganczleich nider ze legen mit irem gvtleichem willen vnd nicht erlawbn noch gvnnen d(a)z si gotzrecht ze tun ey geben dann in iren versessen dienst zu dem dienstag als
vorgenant ist Ich sprich auch daz si in die vorgeschribn acht phvnt geltes in den siben iaren nach anand geben chaufen vnd ruttig machen sullen an alles verziehen ee daz die sibn
iar ausgent Taten sew des nicht so sullen si in ie fur ain phvnt phenning gelts geben vnd raichen zwainczig phvnt gvtter wienner oder gretzer phenning an alle widerred vnd mit irem gvtleich
willen Verzugen si in daz vnd daz aber nicht teten So hat der vorgen(ant) hochwirdig furst der Pischof von Salczburg oder sein Erczpriester an sein stat aber vollen gewalt mit irem gvt
leichem willen in daz singen vnd alle gotzrecht ganczleich nider ze legen vnd in nicht erlawbn noch gvnnen noch si selber dhain gotzrecht nicht tun sullen vncz si es ganczleich die acht phvnt
phenning gelts ob die zwainczig phvnt phenning wienner oder gretzer fur ain phvnt gelts gebent vnd ruttig machent Vnd alle sache volfuren vnd enden als vorgeschribn ist Ich sprich auch
daz mit irem gvtleichn willen aller vorgeschribn sache vnd artickeln die hochgeborn mein gnedig herrn die Herczogen von Osterreich vnd die an ir stat gewalt habnt in Osterreich in Steyr vnd
gnedig leichen sullen sein auf die vorgeschribn sache Ich sprich auch daz si in den vorgeschribn artickeln vnd sach ganczleich mit irem offen brief gelubn vnd bunden v(er)schreibn sulln in aller der mass
als vorgeschribn stet ze geczeugnucz mit mein vnd des obgen(anten) ains des erwirdign fursten herrn Hanses Pischof ze Brixen vnd des w(ol)geborn des hochgeborn fursten Herczog Albrechts von Osterreich
vnd ains des edeln herrn Fridreichs von Wallsee Lantmarschalkch in Osterreich ains herrn Niklas des Loker ze der czeit Official ze Wienn Vnd ains maister Irmharts pfarrer ze Eringanch vnd die weil
Erczpriester auf nider steyrmarch anhangunden Insgieln Taten allew vorgeschribn sach gewandelt ist Ich sprich auch ob si des spruchs aus wolten gen vnd nicht stet wolten habn als vorgeschri
bn stet So sulln si allew ir recht gegen in v(er)lorn habn vnd sullen auch si dhain chloster da ze Furstenueld mer habn noch pawen Sey nu der obgen(ant) spruch getrewleich geschehen vnd auf
payde tail gleich vnd sleht dise sach gewandelt ist worden Bekhennen wir vorgen(anten) pruder Niklas vnd all pruder gemainkleich sand Augustins orden ze Furstenueld daz vns wol genvget vnd
alles daz halten vnd volfuren welln als vorgeschribn ist ze vrchvnt des briefs besigelt mit aigenam des obgen(anten) pruder Niklas vnd ains prior ze Furstenueld vnd mit vnsers conuents pruder
mairs consers gemainch anhangunden Insgieln Vnd ains der obgen(anten) des Lobsames Erwirdign herrn herrn Hanses Pischof ze Brixen ains des edeln herrn herrn Fridreich von Wallsee herrn Niklas Loker
Vnd Maister Irmhart pfarrer ze Eringanch anhangunden Insgieln dew si durch vns pete willn ze ain geczeugnucz an an schaden in disen brief gehangen habnt Geben nach Christes
geburd vier drewczehen hvndert iar darnach in dem Eyn vnd secheczigisten iar des nachsten samicztags nach sand Veyts tag