Ich Erhart wecker Burger zu welspach verjech fur mich und all mein Erben und tun kund offenlich mit
dem brief allen den er furkumbt umb den Geltshuldbrief den ich Inne gehabt hab und mir do laut
auf die erbere frawen katrein Jorgen des Amer weylent Burger ze wienn seligen witib umb
all ir erben hundert guldein haubtguets darumb sy mir ain weingarten mit keller und press an
kostpach gelegen zu furphant verschriben hat nach Innhaltung desselben Geltshuldbrief Item und
ain meldbrief der mir ze Gretz in dem Judenwerchten vor dem Edln und strengen Ritter herrn urban d(er)
pechler die zeit hawbtman und Judenricht ze Gretz gegen dem Judn Juden waschleins sun der
auf der vorgenantn frawen katrein geweisst hat mit Recht erfunden ist nach laut desselben meld
brief Die selben obgemeltn zwen brief Geltshuldbrief und meldbrief hab ich obgenant Erhart
wecker und mein Erben Nun vergeben und eingeantwurt dem wirdigen Gaistlichn herren
Brueder Hannsen litscher die zeit Statthalter Sand Johanns Orden in Osterreich in Steir in kerndtn
und in krain und Comiteür zu wellink und allen seinen Erben wissentlich in kraft des briefs
Nun umb Newnundsibenzigk guldein ung(erisch) und ducaten so guet in gold und gerecht an der wag
sind Also das sy die obgemeltn brief mit alln den Rechten krefftn punctn Nutzen und artikeln als
weit die gelaut habent Nun fur hewtign tag als der brief geben ist umb dy obgemeltn Newnund
sibenzigk guldein Innhabn Nutzen geniessen und allen Iren frumen damit schaffen handln und
tun sulln und mugen als mit andern Iren aigentlichn guet zugeleicher weis als von dem selbn Recht
lich damit wol tuen mugen getun an meniglichs Irrung hindernuss und widersprechen darzue
geben wir In unsern ganzen willn angenem antwurt des briefs besigelt mit des Erbn und weysn
Sebald witterhueler Burger ze wienn anhangundn In Sigel und Jorgen puchel Burger da
selbs anhangundn Insigeln die Ich vorgenant Erhart wecker mit fleiss darumb gepetn hab doch
In baiden und allen Iren erben an schaden Darunder Ich mich benanter Erhart wecker fur mich und
all mein Erben verpind mit mein trew alles war und stet ze haldn das in dem brief begriffen ist
Geben nach Cristi gepurd vierzehenhundert und In dem Achtundsechtzigistn Jar amb Montag
Nach Sand Antonnien tag .