Wier Richter vnnd Rath der Stat Fürstenfeld Bekennen vnnd thuen kund allermenigklich, das vnns der Edl vnnd Vest Francisck von
Azindorff des Edlen vnnd Gestrengen Ritter herren Christoffen von Azindorff (et)c(etera) eelicher Sün, an heüt dato ain Pergamenenn künigklichenn
brieff, mit ainem anhangundem Inngesigel besigelt fürpracht vnnd darneben gepetten hat, denselben glaublich zü vidimiren, sich des an den enden
da Ime Er solchen braicht vnnd Original brieff on sunder fahr nit wol züepringen zü seiner notturfft zügebrauchen, wölcher künigklicher brieff von
wort zü wort also lauttet: Wier Ferdinand von Gots Genaden Römischer künig zü allen zeitten merer des Reichs in Germanien, zü Hung(ern),
von Behaim, Dalmatien, Croatien (et)c(etera) künig, Infant in Hispanien, Ertzhertzog zü Osterreich, Marggraue zü Merhern, Hertzog zü Lützenburg vnnd in
Schlesien, Marggraue zü Laußitz (et)c(etera) Bekennen vnnd thuen kund allermenigklich mit disem brieff. Nachdem wier aus Götlicher schickung
vnnd angebormer güette allzeit genaigt sein, vnnserer vnnderthanen vnnd getreuen dienner Eer vnnd wird züfürdern vnnd zübetrachten, Auch irer
treuen dienst, wie pillich zübelonen. Haben wier angesehen die langwirigen getreuen annemen nützlichen vnnd vleissigen dienst die der Ernuest vnnser
lieber getreuer Christoff von Azindorff von Jugent aüff, weylund kaiser Maximilian vnnserm lieben anhern seliger gedechtnus als desselben Ratt
Türckhscher vnnd Obrister Zeügmaister In Gelderischen, Schweytzerischen, Bairischen, Hungerischen, Venedigischen kriegen vnnd In annder weg. Auch nach
malls vnns vnngespart seins leibs vnnd güets, vnnd nemblichen In wehrem Sün Christoff vnnd Erhan von Azindorff den gantzen krieg wider den
Türckhen vnnd Türggen Im veld treülichen vnnd aufrichtig gethan, erzaigt, vnnd bewisen, hinfür verhoffen wol thuen künden sollen vnnd mögen.
Jn vnnd darumben als Regierunder Behaimbscher künig vnnd Collator des Obristen Johaniterordens Priorats in der Cron Behaim, Ge
dachtes Christoffs von Azindorff Sün Franciscken von Azindorff, dem Jetzigem Comenthüer zü Fürstenfeld Fabian von Aschach zü ainem Coad
iutor benannter Comenthüerey zügeordent gesetzt vnnd zügestelt, züordnen setzen vnnd stellen gedachten Franciscken von Azindorff zü ainem
Coadjutor benannter Comenthüerey hiemit aus Behaimbscher künigklicher macht vnnd als Obrister Collator angetzaigts Priorats in crafft
diß brieffs, mainen setzen vnnd wöllen, das gedachter Francisck von Azindorff In angetzaigte Coadjutorey zü Fürstenfeld Auch derselben eingeleibten
Creycz ordens Geüßlin zü Adeldingen vnnd was darzüe gehörig, tretten soll vnnd mag. Doch in leben des Jetzigen Comenthüers Fabian von
Aschach die Vnnterthanen zü der Comenthüerey gehörig nit vnrecht zübeschweren, Oder irgents was dem Comenthüer oder der Comenthüerey
zü wider handlen vnnd fürnemen. Aber nach tödtlichem abgang Gedachts Fabian von Aschach Soll Er alsdan selbs orden annemen, demselben
pflicht vnnd aid, wie sich gepürt, vnnd die orden in sich helt vnnd vermag thuen, Auch sölche Comenthüerey sambt angetzaigten Zwayen Geüß
len vnnd allen züegehörungen, wie es der Jetzig in helt, vnnd sich gepürt Innehaben nützen vnnd geniessen, Sich auch in sölchem Ritter
lichen orden wie ainen Ritters brüeder gebürt vnnd gepünden ist brüderlich verhalten vnnd erzaigen. Gepietten darauff allen
vnnd Jeden ordensleütten Auch andern vnnsern vnnterthanen was wirds, Stannds oder wesen die sein gedachten Franciscken von Azindorff darin
ne nit hindern noch Irren Sonder bey sölcher vnnser begnadung zü handthaben schützen vnnd schirmen dawider nicht thuen, noch das Jemandt
Irthum gestatten alles lief Ainem Jeden sey vnnser schwere Straff vnnd vnngnad züvermeiden. Das mainen wier Ernstlich.
Des zü vrkhund besigelt mit vnnserm künigklichem anhangundem Inngesigel. Geben in vnnser Statt Wien den neünundzwaintz
igisten tag des Monats Martij. Nach Christi vnnsers lieben herren gepürt Fünfftzehenhundert vnnd darnach Im dreiunddreissigisten Jare. 1533
Vnnserer Reiche des Römischen Im dritten vnnd der anndern aller Im Sybenten. Vnnd dieweill dann wier obbemelter Richter
vnnd Rath der Stat Fürstenfeld disen vorgeschribnen künigklichen brieff an der schrifft, vnnd das Inngesigel daran hangund nach gnüegsamer
besichtigung verlessung vnnd Collationirung allenthalben gerecht, vnargwenig, auch on all geprechen, befunden vnd erkandt. Dem
nach haben wier obbenantem Francisck von Azindorff (et)c(etera) dises vidimus vnnd transsumpt, allen worten des haubt vnnd Originall brieff
gleich lauttund mit vnnserm der Stat Fürstenfeld grösserm anhangundem Inngesigel gefertigt geben. Geschehen phintztag nach dem
Sontag Reminiscere in der vasten Nach Christi gepürt Tausent Fünffhundert vnnd Im Fünffunddreissigisten Jare.