Ierem(us) hampel geswor(e)n(er) richter von den erbfro(n)ten der stat goliperg
vnnd wir schepp(e)n Jm statdinge daselbst Niclas Seybing niclas
Kyme gregor schola michel czeisler hanne yost hannos Kothman
Kuncze keyl Bekennen das vor vnns in gehegetim dinge hanne vn(d)
Niclas lewein gebrudere offlich(e)n entrete(n)ten vnd abetraten
den Jngesessingen h(er)r(e)n vnd Brud(e)r(e)n Creucziger Ordins off vnsim
pfarrhofe in ir(e)r p(re)benda Eyne mark geldis yerlichis czinses mit
samt howptgute vnd howptbrieffe dorobir steende offim garten
petri Borrmans bey dem grabin an der Czettr(a)w den etwe(n)n
Niclas yban eyn erbbesitcz(e)r off sich genome(n) vnd gekawfft
dorn(a)ch danoch Niclas lewe zelig(e)r der Benaten leweinn vatere
mit redelich(e)m kowffin von den nestin an sich bracht hatte
In mase das die gnanten h(er)r(e)n Brudere vnd ire nachkomenn den
czins yerlich nach lawtte des howptbrieffis ermanen vnd mit
howptgutte brieffe vnd czinsin mechtiglich tu(n)n vnnd lasenn
sollen vnd mogen vnvorbrochlich vnnd vnschedelich dem
Testament doran sy den czins benemet vnd gegebin habin
das sy dorinne alle yoer nach geborlichk(e)it haldin sollen
vnnd wellen Geben am dornstage vor Cantate Anno domi(ni)
M(illesimo) cccc(esimo) lxtercio