Wir nochgeschreben hans von Geresdorff heynrich von Nosticz vnd Benedictus von der ybaw selbschuldigen bekennen mit dresim offin bryfe
allen dy en sehen adir horen lesen daz wir von rechter gewissen mit gutem rate recht vnd redelichen vorkewffen vnd virkawfft haben
in eyme rechten erbkawffe dritthalb schok gut grosschin prager munze zittawer zal jerliches zins vnd recht gulde den ersamen hirn her
nicklos Czeppel vnd sinen metebru(der)n der samenunge in dem hawse dez ordens sente johans czu der zittaw vnd allen eren nochkumfftigen
Compt(ur)n vnd brud(er)n do selbste czu eyner gemeyne pyetanczien notdorfft vmb vmb dryssig schok grosschin der obegenant(en) monze vnd zal der sye
vns gancz vnd gar beczalt haben mit guten breyten grosschin daz vns wol genuget merklichen in vnd off myn wirgenant(en) hans von Geresdorff
gut(en) czu henrichsdorffe schribers gelegen vnd namlich off hanns Czebe syne erben vnd gut(en) funffczig g(ro)sschin in vnd off heynrichs von
Nosticz gut(en) czur odnwig auch egenat(en) vnd namlich uff mathis leffchenbume erben vnd gut(en) funffczig g(ro)sschin vnd in vnd uff Benedicten von
von der ybaw gut(en) vnd mit namen uff mathis hampasch erben vnd gut(en) do selbste czu der ybaw funffczig g(ro)sschin alles der virgenant(en) zal vnd
monze adir wer dy virgenant(en) gut(en) in czukumfftigen czyten noch en haben wirt vnd besiczen vnd dy selben obegenant(en) vns(er) gebawer haben wir
vorgeschrebenen hanns von Geresdorff heynrich von Nosticz vnd benedict(us) von der ybaw iglicher den synen geloyst an dy egenant(en) Compt(ur)
vnd brud(er) czu der zittaw den selbigen zins czu geben alle jar jerlichen iglicher funffe vnd czwenczig g(ro)sschin uff sente walp(ur)gen tag vnde
funff vnd czwenczig g(ro)sschin uff sente michels tag vnd also vorbas alle jar jerlichen uff dy selben tage in gumanen czu heben vnd czu nemen
an alles hindirnisse mit solchem gewonlichen vndirscheyde wen wir obegeschreben(en) hanns von Geresdorff heynrich von Nosticz vnde
Benedict(us) von der ybaw mit gesampter hant adir vnse erbn vnd nochkomelinge wellen adir virmogen den zins wedir abe czukawffen
daz sollen der Compt(ur) vnd dy samenunge virgenant(en) vnd alle ere nochkomende Compt(ur) vnd brud(er) dez haws czu der zittaw gestaten vnd
wol gunen vmb eyne sulche virgenant(en) summe dryssig schok g(ro)sschin virgenant(en) monze vnd zal vnd vns mit sampt den gebawern mit
eren virbegenant(en) erben vnd gut(en) adir wer dy noch in wirt haben vnd besiczen ledig fry vnd loes sagen vnd lossen dy wile daz nicht ge=
schijt so geloben wir hanns von Geresdorff heynrich von Nosticz vnd Benedict(us) von der ybaw adir vns(er) erbn vnd nochkomelinge dy ge=
bawer adir ire nochkomende besiczer der selbigen gut(en) aller dinst vnd iglicher beswerige loes sagen vnd fry lossen vnd ab dy czinse gehind(er)t
adir vorterbt worden da got vor sy so haben wir sy en czu geben vnd czu schicken uff allen vns(er)n gut(en) wo wir dy haben an alles hindirnisse
Ouch globen wir by vns(er)n guten trwben dy selben gebawer vnd ere gut(en) czu vor ryten vnd czu vor dyne an andere vns(er) gut(en) an allis arg vnd gevere
Czu orkunde vorfestent vnd bestetiget mit vns(er)n anhangenden jngesegiln an dresin bryff der gegeb(en) ist noch gotis geburt tusent jar
vierhundirt jar vnd in dem czwelfften jare an dem tage vnse(r) lib(en) f(rawen) hymelfart