Ich Endrych von diednbab Landrichter In Glotz vnd Cze Wenczlab schram Ernst schredre Jacob rudiger Wenczel linde Hanns
poppe Nicklos kocz Hanns schottner Anthoni(us) Happner Nicklos Gabel Mertin peschel der gemayner kolbesorg Scheppn do selbist Bekenne
offindlich mit desim briefe das vor vns yn gehegte ding komen ist der Erlauchte H(er)chgebornne furste vnd h(er)r Herr Albrecht Herczog
In Monsterberg Grafe In Glotz (et)c(etera) vnser gnadiger Herre vnd hot yn namen vnd follomener macht der durchlauchtigistn H(er)chgeporn(en) furstynn
vnd ffrawe(n) ffrawe(n) Vrsule gebornen Marggraffynn von Brandburg Herczogyn In Monsterberg vnd Greffynn In Glotz (et)c(etera) seynn gnedig(en) liben
muter vnser gnadigistn ffrawe(n) vffgelossin vnd vorracht Czehn margk ierlicher czinse yn vnd vff dem Gerichts gute In wilhelmsdorff vnd
allin vnd iglichin des selbigin gerichts noczin vnd genissen wie dye mit sunderlichim namen benant sullen adir mogen werdin teyns aws gelossin
der P(re)tarie der Czewalynn allhie In Glotz yn vnser pharre In gebin vnd In Czinssin eynem yden vorweser der selbin P(re)tarie anhebende
vff Walpurgis nehistkunfftig funff marg vnd dornoch vff Michaelis folginde abir funff margk vnd also vff dy bemelten tage alle Iar
Ierlichin In czinssin Vnd der richter In Glotz der yn gettin seyn wirt sal vnd mag vff den egnantn guttern vmb den vorsessin czins als
offte is noth geschict genwg pfandes helffin das man den mag vorsetzin In Cristen adir Iuden an alle beczennge des rechten bas der
czins gantz wirt gericht Mit Hundert schittin vngerischin goldin gut vnd gerecht an golde vnd woge mag man wol wenne man wil desin
czins widir abelossin vorsessene czinse sal man In vore noch wochin cza(l) vorrichtin Czw vrkund hab ich obgnanter Landrichter meynn
Ingesegill nebin der Stat Segill an desin brieff hengin lossin Noch xpi geburt Virczehnhundirt des drittin vnd Newnczigistn Iores
An der Mitwoch noch Sante Elizabeth tage