Wir Ruedolff der annder von Gottes gnaden Erwölter Römischer Khaiser, zu allen zeitten
Mehrer des Reichs, in Germanien, zu Hungarn, Behaimb, Dalmatien, Croatien, Khünig, Ertzhertzog zu Osterreich, Marggraff zu Mährhern, Hertzog zu Lucemburg
unnd in Schlesien, Marggraff zu Laußitz, &c. Entbietten allen unnd Jeden unnsern Unnderthanen, was hohes oder nidern standts, ambts oder
wesens die in unnserm Khünigreich Behaimb unnd desselben incorporirten landen wonen oder seßhafft sonderlich aber denen, so dem Eerwurdigen, unnserm
lieben getrewen, Felician von Mosch unnd Moricz, Rittern S(anct) Johannis Hierosolimitani Ordens Commendatorn zu Glatz, Lemberg, Goltberg unnd Fürstenfeldt
unnsern Behaimischen Cammerrath unnd Haubtman des Prager Schlosses seiner Commenda Glatz zins unnd annderer dienstparkhaiten halber zugethan
unnd verphlichtet, an unnd mit disem unnserm offnem Mandat ersucht werden, unnsern Khaiserlichen gnad und alles guets. Liebe
getrewe. Unns khombt bericht unnd beschwerung für, das etzliche auß Eüch bemelten zinsleütten aine zeit hero sich unnderstehen, sollen, die
Erblichait unnd althergebrachter gewonhait zuewider, Jetz genandten Commendatori oder aber weil Er selbige gedachter Commenden obliegenden dienst
halben in der Perschon nicht beiwohnen khan, seinen hieczu bevollmechtigten Pfleger unnd Ambtman, seine gebürende zins unnd zehendt zue entrichten
weigerlich sein, Welches alles dem, sinthemal es zue grossem schaden, unnd der von Ihm innehabenden Commenden schaden unnd nachtail
geraichen thuet, unnd wir nicht gemainet, das an deme, des Er von Recht unnd Billigkhait wegen befuegt, das wenigist entzogen werden, Da
verwegen, so ist an Eüch alle unnd Jede, so wie bemelt mit disem Khaiserlichen Mandat ersucht werden, unnser gnedigister Ernst unnd helher befelch, das
Ir als unnsere fürsten, Ordentliche Obrighait, Haubt: unnd Ambtleütte, beij den Jenigen, so Eüerer Jurisdiction unnderworffen, unnd sich mit raichung der ge=
bürlichen Järlichen zins, weitten, ainnig weigern unnd dieselben nicht ordentlich entrichten würden, von Obrighait unnd Ambtswegen alles Ernsts da=
hin haltet, damit sy sambt denen allberait verfallenen Intraden auch hinfüro, obermelttem Commendatori oder aber seinem Bevollmechtigten die zins
unnd zehendt, ungesaumbt raichen, getreidigt, ohne alle außflüchte ablegen, unnd sich desselben khaines weges mehr widerseczen, noch unns zue fernerem
einsehen ursach geben sollen, An deme volbringet Ir unnsern gnedigisten ernst unnd lichen willen unnd mainung, Geben in unnser stadt Pilsen, den
funfften Aprilis, im Sechtzehenhundertten, Unnserer Reiche, des Römischen im xxv, des Hungarischen im xxviij, und des Behaimischen auch im xxv &c.
Ad mandatum Sac(rae) Cae(sareae) M(aiesta)tis proprium
Paulus Sixtus Trauthson m(anu) p(ropria)