Ich vlrich vnd ich ditrich von pvechperch. Wir tůn allen den chund di nu ſind vnd noch chunftig werdent. daz wir mit fvr'aintem
vnd mit gůtlichem willen. vlrichen vnſers vetern ſun hern vlriches gelichen haben zerechtem lehen daz lehen daze dem
diepoldes. daz Symon geſtanden iſt. Jm vnd ſiner hauſvrowen. vnd ſinen chinden. ſunen. vnd tǒchtern. gelichen
haben zerechtem lehen. vnd allen irn vrum do mit ſchaffen. zeſetzen vnd zefurchaufen. vnd daz daz ſtæte vnd
vnzeprochen ſei. dar vmb gib ich vorgenanter vlrich vnd vorgenanter ditrich verſigelt vnſern prief zv einer ſteten
ewichait mit vnſerm Jngefiegel. vnd mit den gezeugen di hie genant ſind. daz iſt her chunrad von puechperch
vnd wulfinch ſin ſun. vnd Alber' ſin ſun. vnd Friderich von retelperg. Gundacher ſin průder. weichard von pern
awe. Ruger von pernawe. Rudolf von pernawe. Leupod von durrenpach. wulfinch Leupoldes ſun von durren
pach. Chunrad von Gumping. vlrich von Gumping. Alber' von chirchperch. Otto von chirchperch. Otto der
grof. Chunrad der grof. Ditmar' von hadmarſtorf. vnd Ander' erber' leute di da bei geweſen ſind.
vnd diſer prief iſt gegeben daze buchperch in dem haus Do von chriſtes geburt was tauſent
iar. vnd dreu hundert iar vnd in dem vierden iar zemitter vaſten. andern ſuntage do man an
ſinget. Letare ierusalem.