Ich Hardegen her Jörigen sun von Tözenswess dem got gnad und all mein gesweisterid
und all unser erben. Wir tuen offenleich mit dem prief und tuen chunt allen den
die in sehent oder hörent lesen die nu lebent od(er) her nach chunftig werdent daz wir
unser swest(er) Agnese frawen Agnesen Hainreichs tocht(er) des Ewaissen von Staimpach dem got
gnad. mit recht(er) beschaidenhait nach unser pesten sinne rat. von uns geschaiden haben
und freuntleich des geschaiden ist. daz wir ir geben haben. ledichleich umb irs vater stewer
aygens. daz Staimhaus. daz gelegen ist in dem dorf ze Aschach und waz dar zue ge
hört. ez sey pawngarten oder wald oder wismad. und drew gancz lehen die gelegen sind
pay den seichen. und purkrecht sint. von dem probst von sand Pölten und do man alli
jarich von dient. funf und vierzich wienn(er) phennig an sand Michels tag. Auf den foz
genanten guetn alle ir sey aygen oder purkrecht. wie daz genant ist. schol unser ob
genante swest(er) fraw Agnes und ir erben. allen irn frum do mit schaffen. wie
ir daz aller pest fügt mit verseczen und mit verchauffen und geben wem si wellent
mit uns und mit unsern erben guetleichen willen an all irrung und hind(er)nuss und schol
si auch. mit alle dem guet. nicht ze schaffen haben. daz unser selig vat(er) her Jörg von
Tözenswess hint(er) im lazzen hat. oder daz wir gelten schullen. ez sey hincz juden od(er) hincz
christen. denn als uns. unser anherr sein fegfeuer gangen ist. daz hat si als ir gelassen
von dem erib. und von sammenter hab. Ich vorgenant(er) Hardegen und all mein geswis
terid und all unser erben wir. sein auch der obgenant(er) guet(er) alle. ir sey aygen oder
purkrecht unser obgenant(er) swest(er) frawen Agnesen und irn erben. ir recht(er) schirm
und gewer fur alle ansprach als aygens und purkrechts recht ist in des landes
ze Osterreich in Osterreich. Wer auch daz unser obgenanten swest(er) frawen Agnesen
und irn erben an den vorgenanten guetn. daz an icht ab gieng mit recht wie
si des schaden nemen. si oder ir erben. mit welich(er) lay schaden daz wer den ir umb
pay seinen trewn gesprechen mocht ungeverleich. den selben schaden schull wir in gancz
und gar ab tragen und wider tuen und schullen fur daz habn. auf mir obgenant(er)
Hardegen und auf aller mein gesweisterid und auf aller unser erben und auf aller
der hab die wir habn in dem land ze Osterreich und do von gechomen an chlag
an furbot und an als recht mit unserm guetleichen willen von sein lemptig oder
tod daz die red stät und ungebrochen beleib dar uber gib ich vorgenant(er)
Hardegen in den offen prief besigelt mit meinem anhangund(en) insigel fur mich
und fur alle meine gesweisterid und fur all unser erben. der zeug sind auch
ze geug d(er) erber herr. her Philipp der dehent ze der stat pfarr ze Aschach
und her Chunrat von Prawnshaimsen und Ott d(er) Wolfenreut(er) mit irn anhan
gunden insigeln in an schaden Der prief ist gebn nach Christes gepurd drew
zehen hund(er)t jar. dar nach in dem funf und sechtzigist(en) jar an sand Niclas tag