In Gottes Namen Amen. Zwuschen dem Hochwirdigen Edlen vnndt wolgebornen herrn Eberhart kincko her von der duben r(itter) d(eutsch) O(rdens) r(ömischer) k(aiserlicher) M(ajestät) Camerer vnndt
haubt Statthalter obristen meister des deutzschen prierats, seiner gnaden an einem, vnd den Ersamen weysen burgermeister vnd Radtmannen der stadt
Lawenbregk des andern teyls Ist durch mich Anlassen Lassota von Steblaw d(eutsch) o(rdens) r(itter) seiner gnaden vnd des ordens diener vnndt anwalter diser volgend abredt
vnd vertragk vnd voreynigk gemacht vnndt auffgericht, vmb die Commendatorey alhie zu Lawenbregk, Nach dem nuhe ein Radt der stadt
Lawenbregk das haus der Commendatorey welchs zuuor des mehrn teyls durch brunst vnd vngewitter vast zu nichte vnd entgegangen gewest,
(Vormoge vorgehalts vertrags) restituirt, auff gepawt, vnd wider vmb gepawt haben, damitte nicht hinfurder dasselbige an seynen gebewden desto
schedlicher verfallen mocht werden, auch nhun gestanden zeit vnd lenger das volck mit gottes wort vnndt reichunge der heiligen Hochwirdigen
Sacrament nicht vorlassen, Nach dem obgedachter herr Meister seyner gnaden wegens ampt noch aus mangel vnndt abgang der ordens bruder
vnndt priestern aus dem Conuent, diser zeit die pfarkirchen alhie zu Lawenbregk zuuorsehen nicht vormocht, ist Solichs alles bedacht, vnd darauf
kunfftigs vbel vorzukomen seindt dise gebrechen auff volgenden wege vnd meynungk, beredt vnd abgehandelt, alse in der gestalt das Erstlich der
Radt alhie zu Lawenbregk nuhe sampt aller pfarr ehr gesessunge vnd einkhomen wie die moge genant werden gar nichts ausgenommen der stadt
Lawenbregk gäntzlich vnd vor meniglich vnuerhindert eingenempt vnd beygehalten seindt, Binnen hie noch eynander vo(n) Martini des itzigen
ein vnd funfftzigsten Jares anfahendt, Da kegen sol vnd wird die stadt Lawenbregk nach Inhalt vnndt vormuge des vorigen vo(n) der r(ömischen) k(aiserlichen) M(ajestät)
Confirmirten vertrags allenthalbe(n) den Priester vnndt darinn gehorenden dorffschafft mitt Cirstlichen Priester dienern wie voralters vorsehen, Zum andern
sol die stadt Lawenbregk die gebewd des hauses angezeigter Commendatorey so aus vor der stadt bawfelligk seindt wider vorfertigen, doch also nuhe disser
Conditio das in Lawenbregk das haus der Commendatorey so obn vor der stadt liegk zu eige(n) der wachsunge (da got vorsey) durch brunst in
abenhegk so das feuer vo(n) oder ausser der stadt in dem hause der Commendatorey ankhomen oder aussginge so sol die stadt Lawenbregk die selbigen gebewd
so obn aussen der stadt, wider vmb zu baw(en) vnd auffrichten schuldigk seyn Da fast aber so wege word (da gott vorsey) das die obn genante gebewd
der selbigen Commendatorey durch brunst vngewitter vnd vnbesche(n) vnd das feuer vo(n) oder aussen der stadt bey den gemawerten heusern der selbigen
Commendatorey ankhome vnd angan word, so sol die stadt die selbige gebewd der Commendatorey In vnnd aus der stadt nicht schuldigk zu bawen
ihm Sonder solten das Jar in welchem die brunst geschegk bis auff Martini des selbigen Jars Inne vnd innhabens gebrauchen vnd einnemen
vnd ist zu der geburlichs Sinn des Erblehns vorre(n) Nach laut des vertrages abgen vnd geben, Vnd des selbigen wider vmb als baldt volgend tages
nach Martini s(ancti) g(eorgii) vnd dem orden abtretten vnd einreumen, Zum dritten sol bemelte stadt Lawenbregk alle Jar Jerlichen, von selbigen ein
komen vnd pflichtigkeyten angezeigtes hauses dem herrn meister des deutzschen ordens an stadt der Byschoffen zinsen vnnd geben hundert thaler groschen, oder
also vil gelds an gutter gengen vnd genemer muntze, als hundert thaler groschen ausstragen Anfahendt auff Georgij des kunfftigen Jars ein
funfftzigsten Jares funfftzigk rader groschen Nochmals auff Martini nehst darnach volgend die ander funfftzigk rader groschen, vnd also hinfurder alle
Jar Jerlichs auff dissen bestimpte termin so lange der stadt Lawenbregk bindungk vnd vertragk lingen vnd vnd sich erstrecken wirdt Solichs
alles sol ehr angezeigte sieben Jar stetz, vhest vnd vnuerrugklich vo(n) beiden teyln gehalten werden Nach ausgange aber der sieben Jar sol die stadt
Lawenbregk vo(n) alle vordere(n) schuldigk vnd pflichtigk sein das angezeigte haus, mitt alle seyne(n) zu gehorunge einkomen vnd ehr stand, dem
herrn Meister vnd orden In iren henden denthalben In massen ehr entpfangen, wider abzutretten, mit der reseruatio das der stadt vertraut ist
an alle schaden vnd beschwerungen beider des hauses vnd desselbigen zugehorende einkomens gantz treulich vnd vngeferlich, Damit aber
disser vertragk in alle seyne(n) Clauseln vnd puncten desto stetlicher gehalten werde, haben obn gemelter herr Meister von deutzschen orden vnd
wir gedachte burgermeister vnd radtmannen der stadt Lawenbregk vhn vrbundt vnndt mehrer festigkeyt Jetz Insigel In dissem vertragk
wissentlich anhinge(n) lassen, vnndt Jedes teyll ein Jetz lautendt besigelten vertragk In sich genumen Datum Zu Lawenbregk freytagk nach
Marie Magdalen Nach Christi geburt Im tausendt funffhundert vnd Ein vnd funfftzigsten Jare