Wir Wladislaus von Gotes gnaden In Vngarn
Behaimb Dalmatien Croatien (et)c(etera) Kunig Marg=
graff zu Mahren Herczog zu Luczemburg vnd
in Slesien Marggraue zu Lausicz (et)c(etera) Bekennen
vnd thun kundt allermennigclich das wir dem
gestrengen Sigmunden von Weidlicz (et)c(etera) Kray=
ner ober anser Hofgesinde hauptman vnserm
lieben getreuen vnser Schloß zu Lussow
die Statten vnd ein halb vnd ainen lehe=
man zu Eichendorff Jm Troppauisch weichbildt
gelegen, mit Zinsen diensten pflichten gerech=
tigkaitten vnd allen andern ein vnd zugeho=
rungen, gancz nichts darauß außgenomen,
wie wir die selbsten In nucz vnd brauch biß=
hero Jnngehabt vmb seiner treuen nuczbern
vnd willig dienste willen, die er vns bißher
In vnangesehen leibs vnd gutts gethan, teg=
lich thutt, vnd teglich wol thun mag vnd soll
fur dreyhundert gulden vngrisch gut vnd
gerecht an goldt vnd wag versetzet vnd
verpfendet haben, versetzen vnd verpfend=
ihm auch die hiemit wissentlich In krafft
diß brieues Auß Behmisch kuniglich macht.