In Gotes Namen Amen Wir Bolk von Gots gnaden Herczog in Slesien und Herre czu Munsterberg tun kunt und bekennen offinlichin allen den die dezin kegenwertigin briff sehen adir horen lesin das vor
uns kumen der Hochgeborne furste Herczog Symonduch und Herre czu Teschin und Prior sente Johanni(s) ordin von Jherusalem in Behemen in Polin in Merhern und in Ostirrich mit sinen Comethur(n)
und den Conventen der hauser und der hofe czur Oshin und an dem Tincz und habin uns volkomeclichin und mit genuk underweist das sie er gut czur Pilaw das gelegin ist in unsim Weichbilde
czu dem Kamicz gehabit und besessin habin czu dem hofe czum Tincze von aldirn geczin bis her mit allin sinen geczu(n)denen czinsin gulden Rindren phenigen und getredie und mit allin furstlichin rechtin
herczogin geschesse und unnageldie und ouch getredie mit allin obirsten und nediristen gerichtin und mit dem gerichte das sich anhet obir hals und obir handt und mit dem gerichte an rechtin die selbin
ursachin und ouch also das keener unsir Amptleute Hoferichter lantfoete foeter Herre Rittir knechte sie sy gros adir cleyne sie trete hoth adir nedir richtin sullen in dem vorgenanten gute czur der pilaw und
in sinen greniczen und ouch suldin die Schulthesse und die gebawer geithener und in woner des vorgenanten gutis und dorffis czur pilaw mit unsin brifen und Ingesigel noch mit unsir Amptleute
und hoferichter brife und Ingesigel nicht geladin werdin vor unsir gerichte ouch sullen sie mit eynem bot vor unsir gerichte nicht bracht werdin in dhein(er)ley weise sunder der egenante prior der Comethur
und der Convent in dem vorgenantin hawze an dem Tincze und alle ere nochkomelinge adir wen sie seczin von eren wegin alle sachin richtin suldin in dem egenantin gute czur pilaw und in sinen
greniczen mit allin nuczin und genyssin mit allin weyden und geczelten der wassir und der erdin als von andirn gutern abegesundirt ist mit allin freiheitin frei vor dynste
und allirlei andir dynste bete gebunge ununge sturunge und allis ungeldis und betin uns fleyziclichin das wir en geruchten das egnante gut czur pilaw mit unsin furstlichin brifen czubestetigen und
czu entheilen mit allin rechtin gerichtin guldin czinsin herrschafftin als sie uns undirweyst habin als ovine stet geschrebin das habin wir obingeschrebener Herre Bolk Herczog und Herre czu Munsterb(er)g
an bete ansehen fleyziclichin dorumb wir von uns wegin unsir erbin und allir nochkomelinge wegin di sammt sin und noch wirt werdin unv(er)kerczgin noch irre gemut sunder von gutir vornunft und
mit rate unsir getrewen und edeln manne gutheisin und bestetigen mit kraft unsirs furstlichin brifis dem egenantin Hochgebornen furstin Herczogen Symoduch und Herre czu Teschin und prior
in Behemen in Polin in Merhern und in Ostirrich sente Johanni(s) ordin von Jherusalem und dem Comethur czu dem Tincze und dem ganczen Convent do selbist und allin eren nochkomeling(en)
di in czitin do sin werdin das vorbenante gut czu der pilaw das gelegin ist in unsim egenantin weichbilde czum Kamicz mit allin sinen geczu(n)denen czinsin guldin Rindren und phenigen mit allin
furstlichin gescheffin unnageldie und getredie mit allin furstlichin rechtin mit allin obirsten und nediristen gerichtin mit dem gerichte das sich anet obir hals und obir handt und mit dem gerichte
anrechtin die selbin ursachin also das keener unsir Amptleute hoferichter lantfoete foeter Herre knechte sie sy gros adir cleyne richtin sullin in dem egenantin gute czur pilaw und in sinen greniczen
ouch sullen di Schulthesse die gebaw(er) geithener und alle in woner des gutis czur pilaw und ir nochkomelinge nicht geladin werdin vor unsir gerichte mit unsin brifen und Ingesigeln und ouch nicht
mit unsin Amptleute und hoferichter brife und Ingesigel und ouch sullen sie mit keynen boten vor unsir gerichte bracht werdin in geynerley sunder der egenante prior und der Comethur und
der gancze Convent in dem hawze czu dem Tincze und alle ere nochkomelinge die in czitin do werdin adir wen sie seczin von eren wegin alle sachin richtin sullen in dem gute czur pilaw und in sinen
greniczen mit allin nuczin und genyssin mit allin herrschafftin mit allin geczelten des wassirs und der erdin als es von andirn gutern abegesundirt ist mit allin freiheitin frei vor dynste und allir
lei andir dynste mit welchim namen man die mag benennen frei bete gebunge legir ununge und sturunge sturunge und allis ungeldis czuhaldin czubesiczin ewiglichin und erblichin
czu eyme rechtin erbe und eygin an dem hawze czu dem Tincze gebin her und richtin czu urkunde dis brifis der mit unsim anhangenden Ingesigel ist vorsigilt des ouch geczuge sin Cunczel
von dem wusthuss Thyes hund hanke von Thomicz pabisth von dem Strowne hennil von der Barte michel wilkicz und Hannos Rechnystein unsir hofre schriber dem wir deze sachin
bevolin han geschrebin Gegebin czu munsterb(er)g an sente michils tage als man czelet noch Cristis geburte drezinhundert jar in dem Sibinden und Sebinczigisten jare