Ich Bozoth von Stacho Compt(ur) czu Tyng Bekenne offintlich mit desem brif allen den dy en
sehen adir horen leesen daz vor mich ist komen der geistliche man vns(er) mitbrudir michel
Halvgeling vn(d) hat gekauft recht vn(d) reddlich vf der pictancze vn(d) vf den sibi(n) brudirn
czu Tyng ey mark Jerliches zinses Bemisscher grosschen pohnisscher zal vmb czehen
mark d(er) egenante grosschen vn(d) zal Jarlich czuhebin vn(d) czunemen vf vns(er) ffrauvin
tag lichtmessen miteinandir vn(d) dy selbe mark zinses sal em d(er) pictanczemeister der czu den
selbin geczeitin ist adir noch yn czukunftige czeite mochte keme lipplich vn(d) kintlich an
arg vn(d) hyndirniss vf den vorgenanten vns(er) ffrauvin tag gebin vn(d) beczalin vn(d) ab daz
nicht gesche daz dem vorgenante brudir michel dy selbe mark zinses nicht gefilso
sal en Compt(ur) der yn den selbin geczeitin ist den pictanczemeist(er) vndirweisen daz de(m)
vorgenante brudir michel sey zins lipplich vn(d) guttlich werde ydoch mit zolcher vn=
dirscheit wen got obir den vorgenante brudir michel gebeuth daz der brif zal tot
seyn vn(d) dy pictancze sal der selbin mark zinses los vn(d) ledig sey nymandes
wedirsprechende dez brifes czu orkunde hab ich vorgenanter h(er)re Bozoth meyn
Jngesegil an desen brif gehengit Gegebin vn(d) geschen noch gotis geburth virzen=
hundirt iar dornach yn dem erste iar an synte pauils tag c(on)u(er)sio do bey synd ge=
west dy Jrb(ar)n vn(d) geistliche brudir Jakob pfharrer brud(er) pet(er) hauskempt(ur) brud(er)
Stach brudir Jerye brudir pezke bachmeist(er) brudir Niclas keller brud(er)
lorincz glockner brudir mathis pshuligmeist(er) vn(d) andir lewte bis dy dczu wordin
gerufft vn(d) geladen