Vor vns Sceppen der Scepenbanck, hans ruffart, Erasmus freunde, hanns
dick, peter kofler, hans Cuntze vnd hans iohn, im iare do Georgs kayschwicz das rathgerichte
saß, Erstanden sint in gehegtem dinge, der Ersame francz ruffart vnd georg tewndorff
nebe(n) im franciscus faber der statschreiber, haben vor vns vnd andern erbarn hern
Rathmannen wegen bekant, das donnerstags nach Exaudi nehst vor dato, der Ersame
hans ruffart vnd hans Cuntze, neben im Johan Neithart der statvogt, aus befelh
ains Erbaren Raths, vnd von wege(n) der gerichte gegange(n) sint, in des Sleykmeisters
wohnu(n)ge alhie, haben angehort, das heincz pantel, seiner bants entlediget vnd frey
Entrewmet hat vnd abgetrete(n), aine(n) marg iehrligis Zinsse, vor sibenczehen hungrisch
freye gulde(n), die nach tode seiner mutter vff in geerbet, vnd er gehapt aus krafft ey
nes vnuerserte(n) Sceppenbrieffs den er beweiset, in vnd vff dem hause, welches
etzwan Nickel steinbergis, itzunt adolphi goltbachs des Riemers, Zunehst Eras
mus kellern, vff der Cayschwiczgasse gelege(n), Zwhande(n) dem wirdige(n) hern Mathie
pauli, plebanher des Creutzhernhawse zur Stregaw, vnd seine(n) rechte(n) nachkome(n) ple
banhern daselbst, dem(n) Zunucze(n) vnd Zulesse, vnd der Zins sol iehr gfalle(n), nach dato
des alten brieffs, der gegebe(n) was Nach Cristi geburt funffczehenhundert dornach im vier
vndzwainczigste(n) iare, im nehste(n) dinge nach Egidii halb vff walpurgis, vnd vff Michae
lis nachvolgende(n) auch halb, vnd also fortgan alle iar gleich, Geschege das nicht, so soll
im der obge(n) pfande helffte, in vnd vff bemelte(n) hause, dz pfant sy vor aine(n) Zins außstehe(n)
muge, gleichsa(m) sie alle recht dinglich damit begange(n) hette(n), wen aber des gnante(n)
hauses besitzer, den Zins mit sibenczehe(n) hungrische(n) gutte(n) gulde(n) wid(er)kaufft, dan soll
bemelt haus loß sein vnd ledig, Zcu geczeuge sint vnsere ingesigel an diese(n) brieff
gehange(n) Nach Cristi geburt, funffczehenhundert dornach im .x.x.x.x.i. iare im nehste(n) dinge
Nach Exaudi