In gots namen ame(n) Wir Ludwig von gots gnaden Herczog in Sles(ien) herre zcu(m) Brige und zcur olaw Bekennen offentlich in disem briff allen
den dy en sehen adir horen lezen daz vor uns komen ist Gungel von Borsnicz myt gesunden leybe myt gutir vornunft
unbetwungen und unbetrogen und hat myt wolbedachtem mute seyner frunde rathe und ratlich vorkouft und offgelassen funff
vyrtel freyges erbis und in pfluge und sechs czinsbaftige hufen ane eyn vyrteil gelegin zcu Nemyn in dem dorffe in unse(m)
olawschen wichbilde myt welden puschen puschichtin ruthen strewezerten wesen weyde wassir wassirlowffen myt allir andirn
czugehorunge wy man dy benemen mag keyns uszgenomen alz sy in irn reyn und greniczen von aldirs byz her gelegin synt zcu
alle dem rechte und zcu alle der herschaft und freyheyt alze sy an en gehort habin umb dritthalb hundirt margk pregischir
groschen polanyschir zal dy en gancz und gar dor umb bezalt synt und hat sy an synen muth gewant hat dem irluchtin
fursten Herczog Symonis herre zcu Theschen geist(lichen) sant Joh(ann)is ordins von Jher(usa)l(e)m zcu Beem polan osterich und stirmark unse(m)
lyebin swog(er) und synen nachkomlingin dez selbin ordins zcu nucze und zcu fromen zcu dem hoff zcur olczen gelegin in unsem
olawschen wichbilde zcu habin zcu vorkoufen zcu vorseczen zcu vorwandeln und an irn nucz zcu wenden alz en daz allir nuczlichst
mag gesyn. Daz hab wir durch ire beydir seyt bethe wille en dez koufs gegonst hyen rechen und habyn gelegin dy vorgnant(en)
funff virtel freyges erbe und dy sechs czinsbaftigin hufen ane eyn vyrtel zcu Nemyn gelegin in dem egn(anten) wichbilde myt
wesen weyden welden puschin puschicht wassir wassirlowfftin zcu alle dem rechte herschaft und freyheyt myt allir czugehorunge
alz vorgescrebin steit keyns uszgescheyden wy daz nemy(n) hat dem vorgn(anten) irluchtin fursten hern Symonis Herczog zcu Teschen
unse(m) lyebin swog(er) geist(lichen) sant Joh(ann)is ordins zcu Beem polan osterich und stirmark und synen nachkomlingin dez selbin ordins
ewiklich und erblichin zcu nucze und vromen zcu dem hoffe zcur olczen in dem egn(anten) wichbilde zcu habin zcu vorkoufen zcu vor
seczyn zcu vorwandeln und an irn nucz zcu wenden alz en daz allir nuczlichst mag gesyn doch unschedelichin uns und unsirn
nachkomlingin an unse(m) obirsten rechte gewonlichen dinste und an allen andirn unse(m) furstlichin rechen und herschaften dy
wir uff den egn(anten) hufen uns und unse(m) geerbin gancz und gar behaldin dcz czugeczugnisse hab wir en disin briff vor
segelt heyssen gebin myt unse(m) Ingesigel zcu(m) Brige am nehsten firtag vor dem Sontage alz man singit Inuocauit
nach gots gebort dreyczenhundirt jar ym funften und sebenczigsten jare do by synt gewest unse lyebin getruwen her
Niclas kunsancz her Hanke von sleicz rittir dytherich von Redirn Gregor zagadel Peczke kunsancz pecze zandal und
Ilyas unse schriber dem desir briff bevolin wart