Frater Antonius de Paula
DEI gratia sacrae Domus Hospitalis sancti Joannis Hierosolymitani et militaris Ordinis sancti Sepulchri Dominici Magister humilis pauperumque Jesu Christi Custos: Et nos Baiuliui Priores Commendatarij et fratres Consilium Completum in Domino celebrantes. Ven(erabili) Relig(ios)o
in Christo nobis praecharissimo fratri Guillelmo Wradslav Prioratus nostri Boemiae Priori, et cuicunque alteri in dicto Prioratu locumtenenti seu Praesidenti Salutem in Domino, et diligentiam in commissis nostrisque firmiter imo utriusque apostolicae obedire mandatis.
Cum capitula, seu Comitia generalia a maioribus nostris sapientissime instituta sint, ut quae in Ordine nostro deformata reperiri contingeret tam circa mores Religiosorum nostrorum, quam alias reformentur, leges, ac statuta ad bene beateque viuendum accomode
condantur, caeteraque rebus, quae ad firmandum, amplificandumque statum Religionis nostrae facere dignoscerentur consuli possit foeliciusque prouideatur, sicuti a Reuerendis isdem Capitularibus deliberatum, et decretum erat nostrum Capitulum generale prima
Dominica mensis Octobris de anno mill(esi)mo sexcentesimo decimo octauo fore celebrandum! Verum cum temporis uarietas, rerum incommoditas, pleraque alia impedimenta id non paterentur ipsius Capituli celebratio pluries prorogata est. Demum uero cum nobis
nuper exhibitae fuerint literae apostolicae motus proprij Sanctissimi Domini nostri Papae sequentis Tenoris. VRbanus Papa Octauus. Ad futuram rei memoriam. Cum sicut accepimus Capitulum Generale hospitalis sancti Joannis Hierosolymitani
a sedecim annis, et ultra celebratum non fuerit, cum tamen iuxta regularia illius statuta, seu stabilimenta, uel ordinationes Capitulares apostolica authoritate confirmatas in ipso generali Capitulo de statu Religionis, ac de illius, bonorumque et iurium suorum con=
seruatione, morumque ipsorum Religiosorum correctione, et alijs eidem Religioni admodum utilibus, et proficuis agendum sit. Nos felici, atque prospero ipsius Hospitalis, eiusque militum, et aliorum fratrum quorumcunque statui, regimini, et gubernio, quantum cum D(omi)no
possumus consulere uolentes motu proprio et ex certa scientia, ac matura deliberatione nostris, dilectis filijs Antonio de Paula Magno magistro, et Consilio eiusdem Hospitalis in uirtute sanctae obedientiae, ac sub indignationis, et alijs arbitrij nostri poenis
apostolica authoritate tenore praesentium praecipimus, et mandamus, ut statim, atque praesentes literae nostrae sibi exhibitae, seu intimatae fuerint celebrationem Capituli generalis eiusdem Hospitalis Dominica secunda, quae erit dies decima quarta
Mensis Aprilis anni proxime uenturi millesimi sexcentesimi trigesimi faciant, ut moris est indicant, citationesque in forma relaxent, ac Baiuliuis, Prioribus, et quibuscunque opus fuerit pro Capitulo generali h(uius)m(o)di celebrando intimari curent, et faciant prae=
cipiendo quod illi, qui ex legitimis causis illuc accedere, et in Capitulo huiusmodi interuenire non poterunt suos procuratores mandatis instructos mittant, seu prouideant iuxta formam stabilimentorum ipsorum conficienda, illaque duplicata transmit=
tant, ita ut omnino ipsa mandata realiter per totum mensem Decembris praesentis anni in Conuentu eiusdem Hospitalis praesententur, alterum nempe directum eidem magno magistro iuxta solitum, alterum uero unicuique ipsorum constituentium
respectiue mediantibus receptoribus, et in illis ubi per schedulas, seu scripturas priuatas, aut literas patentes, uel missiuas, aut alias quomodolibet fieri contingeret tam nomina, et cognomina constituentium, quam procuratorum constitutorum eadem manu
describantur. Non obstantibus quibusuis constitutionibus, et ordinationibus apostolicis, necnon intimatione ipsius Capituli hactenus forsan emanata, et quatenus opus sit dicti Hospitalis etiam Juramento, confirmatione, apostolica, uel quauis firmi=
tate alia roboratis statutis, et consuetudinibus stabilimentis usibus, et naturis, ac ordinationibus Capitularibus priuilegijs quoque indultis, et literis apostolicis in contrarium quomodolibet concessis, confirmatis, et innouatis. Quibus omnibus illorum
tenores praesentibus pro sufficienter expressis illis alias in suo robore permansuris hac uice dumtaxat specialiter, et expresse derogamus, caeterisque contrarijs quibuscunque. Datum Romae apud sanctam Mariam maiorem sub Annulo Piscatoris Die
Nona Junij Millesimo Sexcentesimo Vigesimo Nono. Pontificatus Nostri Anno Sexto. M. A. Maraldus. Quapropter cum nostrae intentionis sit dictum Capitulum generale celebrare, mandatisque Sanctitatis suae (ut tenemur) obedire, legitime
ac more solito in unum conuocati apostolica authoritate fungentes, celebrationem ipsius Capituli ad Dominicam secundam quae erit dies decima quarta mensis Aprilis anni proxime uenturi millesimi sexcentesimi trigesimi tenore praesentium
indicimus, et intimamus, Vos caeterosque Baiuliuos, Commendatarios, et fratres dicti Prioratus certiores facimus, et denuo notificamus, quod Generale Capitulum hic in nostro Conuentu diuino suffragante auxilio dicta dominica die habebitur, et cele=
brabitur. Te igitur Venerande Prior monemus, hortamur, et citamus, ac si opus sit in uirtute sanctae obedientiae tibi praecipimus, ut ad dictum Capitulum die praefixa accedas, et personaliter compareas si poteris, sin minus per Procuratorem de generalibus
et particularibus negotijs istius Prioratus sufficienter instructum. Insuper tibi Ven(erabili) Priori, seu tuo locumtenenti, uel Praesidenti dicti Prioratus mandamus, ut has nostras literas statim atque eas acceperis in Assemblea Prouinciali eiusdem Prio=
ratus serio ad hoc legitime conuocandos, et celebrandos ad claram omnium notitiam perlegere, et publicare facias, hastasque simili consultatione ibidem Commendatarij praedicti Prioratus Procuratorem de negotijs eorum pariter bene instructum
eligant et deputent, qui in Capitulo Generali eorum nomine intersit, ac consultationibus, actis, et deliberationibus eiusdem Capituli, ac Reuerendorum isdem Capitularium iuxta normam statutorum consentiant obseruata dispositione eorun=
dem statutorum, et ordinationum Capitularium circa modum, ac stilum obseruandum in procuratorijs mandatis, et cathalogis, seu ut uulgo dicitur Rotulis conficiendis, et mittendis a Prioribus, Baiuliuis, et Commendatarijs, et praesertim
forma praeinsertarum literarum apostolicarum quoad ipsa mandata duplicata transmittenda, et per totum mensem Decembris praesentis anni in hoc Conuentu omnino praesentanda, et prout in eis dirigendis, caeteraque omnia et singula in eisdem
literis Apostolicis expressa ad illorum praescriptum accurate exequenda. Significantes Vobis praemissis quod Vestra absentia, seu contumacia in aliquo non obstante Capitulum ipsum in termino statuto celebrabitur. In cuius rei Testimonium
Bulla nostra Communis plumbea praesentibus est appensa. Datum Melitae in Conuentu nostro die sexta mensis Julij millesimo sexcentesimo Vigesimo Nono.