Wir Ferdinand der Dritte von Gottes gnaden Erwehlter Römischer Kaiser
zu allen zeitten Mehrer deß Reichs in Germanien zu Hungarn Böhemb Dalmatien Croatien vnd Sclauonien (etc.) König Ertzhertzog zu Österreich Marggraff
zu Mähren Hertzog zu Lützenburg vnnd in Schlesien, vnnd Marggraff zu Laußnitz (etc.) Bekennen offentlich Vnd thuen kundt mit diesem brieff Jedermenniglich, demnach Vns der Würdige Vnser andächtiger Vnd lieber
getreuer Crispinus Weihbischoff zu Prag, abbt Vnsers Stiffts Vnd Gottshaußes Strahoff, Vnd Visitator deß Heyligen Præmonstratenser Ordens in Vnserm ErbKönigreich Böheimb, Vnd dessen incorporirten Landen, demüetigist zuuer=
nehmen geben, waß massen daß ihme anvertraute Closter nit allein gantz ruiniret, sondern auch die noch besitzende Stiffts guetter alß erschöpfft wehren, daß das Conuent itziger zeit kaumb zuvnterhalten, Viel weniger mittel habe,
seine Creditores zubefriedigen, Vnd weilen er aber Vorlengst wegen der Graff Aldringischen Legaten, Vnsere gnedigsten Außsatz nach, eine richtigkeit zumachen, Vnd dieselbe der gebühr nach abzustatten, deßhalben
Er gehorsambist gebetten, Wir ihme Vmb dieser Vrsachen willen, Vnsern gnedigsten Consens, damit er daß durch deß Graff Aldringischen Testament auff sein Closter mit grosser beschwär kommene Guett Vneßloß, feill bietten, Ver=
kauffen, Vnd Ver alienirn möchte, Vnd Wir nun in ansehung dieser seiner billichmässigen bitt solches ihme nicht Verwaigern wollen. Derhalben so geben, Verstatten Vnd erlauben wir gedachten
abten hiemit in krafft diß brieffs, daß er Macht haben solle, obbenandts Guett Vneßloß sambt allen Vnd ieden dessen appertinentien zuveralienirn Vnnd zuverkauffen, Vnuerhindert iedermenniglich, Jedoch daß das Kauff=
gelt vnuerhind zu abstattung der Aldringischen Legaten appliciret Vnd deß Vbrige seinem Closter widerumb zum besten angelegt werden solle. Gebietten hierauff allen Vnd ieden Vnsern
Inwohnern Vnnd Vnterthanen, waß Würden, Standts, Ambts oder wesens die in Vnserm ErbKönigreich Böheimb seindt, Insonderheit Vnsern Verordneten Königlichen Statthaltern zu Prag, hiemit ernst Vnd Vesteclich, daß Sie mehrbesagten
abten Vnnd Wer Von ihme solches Guett rechtmässig an sich bringen wirdt, bey diesem Vnsern ihme ertheilten Consens Vnd Verwilligung, schützen Vnd handthaben, Sie darwider in kainerley weiß noch wege besweren, noch beschwähren,
sondern Sie gäntzlich darbey Verbleiben lassen, darwider nicht thuen, noch andern solches zuthuen Verstatten sollen, bey Vermeidung Vnserer schweren Straff Vnd Vngnad, daß mainen wir ernstlich. Zu Vrkundt
diß brieffs besigelt mit Vnserm Kaiser Vnd Königlichen anhangenden grossen Insigel, der geben ist in Vnser Stadt Wien, den Zwey Vnd Zwaintzigsten Monathstag Martij nach Christy Vnsers lieben Herrn geburth, im Sechtzehenhundert Ein
Vnd fünfftzigsten, Vnserer Reiche deß Römischen im fünffzehenden, deß Hungarischen im Sechtzehenden, Vnd deß Böhaimbischen im Viertzehenden Jahre.