Wir Hannan Alder Richter Thomel prawmbart Ticz elcner der Juncg Schepfenmeyst(er) in den czeiten Niclas schonhar Stephan schik
Bernhart gruber Thomel hager elncz peyer wenczlab kauffman Hensel herkel Hensel schuttenhelm Hansman koringer Hannan
kumpner mathes gros Jacob fugal vnd dy andern Schepfen gemeinlich des perges czu Chutn Bekennen vnd tun kunt allen den
dy nu sein ader hernach kunftig werden das fur vns komen ist in einen vollen Rat da alle sache kraft vnd macht nemen vnd behalden
Dy ersame fraw Merll schibacht werthn vnse libe mitburgerynne vnd hat bekant mit wolbedachtem mute williclich vnbetwungen von
iren vnd aller irer erben vnd nochkumlingn wegen wy das sy mit willen vnd wissen hansen irs suns recht vnd redlich verkauft
vnd aufgebn habe verkauft vnd aufgibt mit kraft dicz briefs Czehen schok guter grosser prager vff iren hoffe
vnd erbe gelegen czu zittucz in czaptaler kucz auff allen vnd iglichen seinen czugehorungen mit welichem name dy genant mugen
werden dem bescheydn Andres polener auch vnsm libn mitburg(er) seinen erben vnd nochkumlingn vmb hundert schok guter grosser
prager pfenning di do gancz vnd gar vorricht sein vnd beczalet czugebn vnd czuczinsen ein halbentail desselben czins das sint funff
schok guter grosser prager muncz auff sant Jiligen tag der schirst kunftig wirt vnd das ander halbentail das seint auch funff
schok der egenan(ten) grossen auff sant Gallen tag der darnach am nehesten volget vnuerzogenlich vnd also czinsn vnd czinsen auff di=
selben czinstege sonderlich vnd ewiclich als czins recht ist in czukunftigen czeiten wer aber sache ab dy wirgenan(te) fraw Merll ire erben
vnd nochkumlingn ader dy besiczer des vorgenan(ten) hoffs vnd erbes czu zittucz an beczalung des egenan(ten) czins saumig wurden czu weliche
czinstage das geschee do got fur sey So sol czuhant auf ein iglich schok grosser des vorsessen czins alle wochen dy weil d(er) czins vn=
uorgolden ist Syben gros czu richter czinssn geen vnd wachsen wen denn der obgenant Andres polener seine erben vnd nochku
lingn des vorsessen czins mitsampt der puss dy dorauff gangen vnd gewachsen were nicht lenger peyten noch empern wolden So mu=
gen sy mit eygner kraft mit hulff des Richters vnd der Schepfen des perges czu Chutn dy in czeiten sein werden ader mit macht
aller vnd iglicher der sy darczu genissen mugen den obgenan(ten) hoffe vnd erbe czu zittucz vnd alle seine varende vnd vnvarende habe
pfenden diselben pfant treyben trugen furen czuuerseczen ader czuuerkauffen getailt ader miteinande(r) vmb den vorsessen czins vnd
vmb dy pussen dy sich dorauff geczinset vnder christen ader juden an aufirbot eins iglichen gerichtes mit vollen rechten vnd das so
ofte czinsn als oft der czins czu seinen gewonlichen czinstegen von den besiczern des obgenan(ten) hoffs vnd erbes czu zittucz plibe vnuorgold(en)
Auch sunderlich gigelegt wen dy vilgenan(te) fraw Merll ire erben ader nochkumlingn einen andern czins Czehen schok gros auff einem
andern hoffe vnd erbe also gewissen bey einer meil vmb den perg gelegen dem oftgenan(ten) Andres polener seinen erben vnd nochkum
lingn kauffen vnd gewisen So sol der vilgenant hoff vnd erbe czu zittucz vnd alle seine varende vnd vnvarende habe von dem obgenan(ten)
czins frey sein vnd ledig vnd wer den kegenwortigen brieff hat dem gepuren alle wirgeschribn recht diser sach czu einer stetig vnd
ewigen sicherhait haben wir Richter vnd Schepfen des obgenan(ten) perges czu Chutn vnser gemein Jngsigel das hiefur czu geczewikniss
an dysen brieff gehenget der do gebn vnd geschribn ist noch cristi gepurt Tausent drey hundert vnd darnach in dem Achte vnd
Newnczigistem Jare des nehesten Sunnabents fur sant Mertens tag