Wir Andris plumel Richter Ticz Clems Johannes von Jermer Schepffenmeister in den czeiten Cristoff Vorsucher Hensel Heckel Waczlaw vorsucher Wenczlaw
Anstliber Jax vom Tendelmark Mertem Teuber Hanns kauffman Hensel medengoss Gregorius Osterman Hensel pfeun vnd ander Schepffen gemeinlich des Bergs
zum Chutn Bekennen vnd tun kunt allen den die nu sein ader hernach kumpftig werden das fur vns kumen ist in einem vollen Rat do alle ding crafft nemen vnd
behalden der bescheiden Fridusch kimel vnß liber Mitpurger vnd hatt bekant mit wol bedachtem mut vnbetwungen von seinen vnd aller seiner erben vnd nach
kumlingen wegen wie das er recht vnd redlich vorkaufft vnd auffgeben hab vorkaufft vnd auffgibt in crafft dicz brieffes vff seinem Gut vnd Erb genan Boymans
gelegen in Czaslawer kreis auf den pawern desselben dorffs vnd auff allen andern seinen rechten nuczen vnd zugehorungen Vier schok gross Jerliche czinse
dem bescheiden Bernhard praunwart auch vnserm Mitpurger seinen erben vnd nachkumlingen vmb Virczik schok guter gross prager muncz die derselb Bern
hart dem egnanten Fridusch mit bereitem gelt geracht vnd bezalt hat zu geben vnd zu czinsen ein halben teil des egnan czins das sint czwei schok guter gross
prager pfennig vff sant Johannes tag des Tewffers der am nesten kumpftig wiert vnd das ander halben teil das seint auch wei schok derselben gross auff
Weihnachten die dornach am nesten volgen Jerlich als czins recht ist vnborgogenlich Wer aber sach ab der egnan Fridusch sein erben ader nach kumling
ader di besiczer des egnan gutes vnd Erbs zun Boymans an bezalung desselben czins sewmut wurden zu welchim czins tag das gesche do got fur sey So sol
zu hant noch einem iglichen czins tag vff ein iglichs schok vorfessen czins alle wochen die weil der czins vnuorgolden ist sechs gross zu rechter vngeltung gen
vnd wachsen Wenn den der vorgenan Bernhard sein Erben vnd nachkumlingen des vorfessen czins mitsampt der puss die dorauff gangen vnd gewach
sen wer nicht lenger peiten noch enpern wolden So mugen vnd sullen Bernhard praunwart sein Erben vnd nachkumlingen das vorgenan Gut
vnd Erb Boymans vnd alle sein Varend vnd vnbarende hab vnd auch di pawern do selbft gesessen vnd Ir guter mit hulff Richters vnd der Schepffen
des Bergs zum Chutn di in czeiten sein werden ader mit macht aller vnd iglicher der er dorzu genissen mag pfenden dieselben pfant treiben tragen furen
zu vorsetzen ader zu vorkauffen Criden Cristen ader Juden geteilt ader mittenander an auffgebot eines iglichs gerichtes mit vollen rechten vnd das so
offt zu tun als offt der czins zu seinen gewonlichen czins tagen mitsampt den pussen die dorauff gangen vnd gewachsen weren von dem obgenanten Fridusch
seinen Erben vnd nachkumlingen oder von den besiczern des Gutes vnd Erbs zun Boymans blib vnborgolden Auch sunderlich zugelegt das der obgenant
Fridusch sein Erben ader nachkumlingen den offt genan czins vier schok gross mit Virczik schocken vff di nesten Weihnachten die nest zu kumpftig werden
abledugen mugen vnd sullen Wer aber sach ab sy des vff denselben tag nichten teten so sullen dieselben vier schok czins auff das vilgenan Gut vnd Erb Boy
mans vnd auff di pawern vnd Ir guter do selbft gesessen ewiglich bleiben in allen pussen die vor benennet sein vnd wer den gegenwortigen brieff
hat dem gepuren alle vorgeschriben recht Dieser sach zu einem geczeugnuss vnd besser sicherheit haben wir vnser Ingesigel das gross an diesen brieff
gehangen der Gegeben ist Nach Cristi Gepurt Virczenhundert Jar vnd dornach in dem Sechsten Jare des nesten ~Montags~ nach dem ~Obertag~ ~tag~