Ich Conrad Pauttmair derzeit Stat und Lanndtrichter zu Kitzbuhel Bekhenn hiemit offennlich gegen allermenigclich
Das an heint dato furumb khommen ist der Erber Balthasar Kärzinger weilunndt Anndreen Kärzingers wonnhafft alhie und Dorotheen
Lachnerin seiner ehelichen Hausfrauen baider seligen Ehelicher Son, bittendtnach Zaigen diß briefs Mit dem Anzaigen Wie er
sich am dreissigisten tag des monats Apprillis Jungstverschinen, Innamen des Allmechtigen Gots, mit guetter vorbetrachtung und
willigem gemueth Ehelicher verspruch hab, Zu der Erbern Regina Tummerin weilunndt Hannsen Tummers zu Rattenberg und
Katharinen seiner gelaßnen witib Ehelicher tochter, so diser Zeit alhie zu Kitzbuhel bey dem Frannzischen Closter Burger daselbs ge
diennt hab, Nach dem er dann willens seinen hanndtwerchs nach erwelten zuziehen, Dahin er sein Hausfraun mit sich zunemen
gedacht sein, Damit er nit etwo verdacht oder verungewist werde, Als ob er hindert ainem Jederman sein tochter oder annderbs
Bild so etwo anverwandten zunem, darvon unrechtmessig furen, wer er ainer urkhundt notturfftig, der demer sonnder seinen
ehrlichen Abschid von hie mit seinem ehelichen lieben gemahel haben mochten, Wolt also furumb den wirdigen Herrn Johann Miegl
derzeit Caplan alhie vorgedachten Frannzischen Closter als wirt dabey er sein hochzeit gehalten, Cristoffen Pötsch ains Burger
als seinen gehalttnen hochzeit stewer erbetten, unnd weisen Matheisen Stainer als seinen Brautstewer und Albrechten Wönner Burg
als ainen Ambt der obgeschribnen geladnen auf seiner hochzeit Mitgesessnen bitten, Dises zeugnus wolten darobnen aller bey Irem
gueten getrewen angenomnen aiden rats zeugnus sprechen, Was Inen umb Balthasarn Kärzinger das lebendig warer
khundt unnd wissen sey, Solich zur sprechen hab Ich Richter nach ordnung gerichtlichs gebrauchs mit allen notturfftigen worten
zulassen und ansehen wie sich geburtt gethan, Hierauf hat vorgedachter Herr Johann Miegl bekhendt Und anzaigt
An vornembtem Jungstverschinen dreissigisten tag Apprillis hab er In sainnt Anndreen Pfarrkirchen alhie den Balthasarn
Kärzinger und Regina Tummerin als sein ehelichte braut In angesicht der versamblung offentlich nach gotlicher und Cristen
licher ordnung zu ehelichem stannndt Eingelait zusamen geben, und der pflicht, das Sy niemandt dann Got der Allmechtig
schaiden muge, Der Cristoff Pötsch Ist der Anmueß hafft daczue er vom preutgamb erbeten worden, Matheiß Stainer der
Brautstewer, Frannzisch Closter das das die braut vier Jar lanng und biß auf Ir hochzeitlich freidenfest bey Ime ge
diennt Auch als wirt der Gastaltung, Und Albrecht Wönner Burger daselbs das er auf diser Irer hochzeit Ambt
anndern ehrlichen biderleutten ain geladner gewesen sey und derselben zustewr und ler, das solichs got wol gefelligem stannndt
Ier so als ain ehrlicher außgewelts bekhanntlich, hellig und bestanndig gewesen, Wie dann Ich Richter solhs Auch bekhenn
Das Ir hochzeitmal nach der brautten Einsegnung bey Frannzischen Closter Eingenomen worden, Dieweil er dann solichs
alles gerichtlicher urkhundt umb seiner Eherung zu baiden hanndten zu stellen begert, die dann zu recht der warhait niemandt
versagt noch abgeschlagen werden solle, So hab Ich mergemelter Richter Ime Balthasarn Kärzinger und seiner ehelicher Haus
frauen Regina Tummerin disen brief der obmighait wegen, Mit meinem aignen hieranhangendem Innsigl verfertigt ge
geben, doch der Herrschafft mir unnd anndern Innsigl und nachkhomen onschaden, Beschehen am vierzehenndten tag Maij
Nach Cristi unnsers lieben herren und seligmachers gepurt funfftzehenhundert und im vierundsechtzigisten Jare