Wir Daniel von Gottes gnaden des heiligen Stuels zu Meintz Ertzbischoue des heiligen Römischen Reichs durch Germanien ErtzCantzler vnd Churfürst (et)c(etera)
Bekennen vnnd thun kundt offentlich mit disem brieff, Demnach vns vnser Amptmann zu Fritzlar vnnd lieber getrewer Conradt von Rodenhausen vntertheniglich ersucht vnnd gebett, Wir wolten Jme in namen sein selbs,
auch Hans Jörgen seines bruders, Vnd dan Hans Wilhelmen vnd Ebrt Wilhelmen, Gebrüder vnd geuettern v(on) Rodenhausen, die Jenige Erb vnd manlehen, die etwan sein Conradts Vatter seliger Ebrt von Rodenhausen vnd Conradt von Bosen, auch absterbe
~en~ weilandt Philipsen von der Linge, welcher vns ainige Erben nit vnderlassen, von wegen Jrer Haußfrawen vnnd Mütter als frawen heimblichen von vnserm vorfaren Ertzbischoff Albrechten löblicher gedechtnus zu
Lehen empfangen, gnediglich leihen, Vnd vmb derentwillen Jnen hierbey ein Copia ains lehenbrieffs vom Jhar ain tausent funffhundert zwaintzig siben, vnd dann ain abtheilung vnd Vrkunden gleichung fürgelegt, darauß der Vain von
Bosen den selbigen Jrem thail lehen nicht außgeschlossen abtretten, vnd dem Vain von Rodenhausen ewiglich cedirn vnd vbergeben, auff maß darinn weitter außgefürt, thut erwehnug, Da Jemandts were der Jnen
den Vain von Rodenhausen Jetzs oder künfftiglich derenthalben an sprach vnd forderung in recht thun wolt, demselben Jederzeit Entweders recht zu thun, Das Wir darauff dise seine, als vnsers Dieners vnnd lehenmans vnter=
thenige bitt vnnd anrüffen in gnaden angesehen, Vnd haben Jme Conradten von Rodenhausen sambt obgedachten seinen brüder vnd Hans Wilhelmen vnd Ebrt Wilhelmen von Rodenhausen vnd Jren Männlichen leibs erbleh=
ens Erben, nachuolgends Erb vnnd Mannlehen gnediglich gelihen vnd leihen die Jnen in Crafft diß brieffs, was Wir Jnen von gnaden vnd rechts wegen, Allermassen gestalt daran leihen sollen vnd mögen, Erstlich
zu Crolsden den Burgseß, dabey die behausung bey den linden im Pforten zu Amöneburg mit Jrer zugehörung, Jtem zu Azamlehen dreissig Morgen Ackers, vngefehrlich am Valckener, anß ein an zweyen oder dreyen stück=
en, Jtem Sechtzehen Morgen vngefehrlich an der Laimkautten vber dem Haine, Jtem drey morgen stossen auff den wege vnden der Vlmbachs wiesen, Mehr drey Morgen auff der andern seitten stossen auff die Vlmbachs wiesen,
Jtem ain Morgen am Geißmar pfade, Jtem aindthalb Morgen vber der straß an Eilbach von Rodenhausen, Jtem vier Morgen hinder dem Roffen, vnnd zwen Gärten bey der Mühlen, sein anderthalb Morgen, Jtem drey
Morgen vber dem Ruckershainer wege bey dem Banne, Jtem vier Morgen stossen an Ransperg bey der stadt linden, Mehr sechs Morgen an zweyen stücken, sambt der Hofreit zu Amöneburg vmb secht vnd viertzig gulden, Jtem
vierthalben Morgen, ein gart vor der Pforten, sambt den Kornzehenden daselbst vngefehrlich vor sibentzig ein gulden, Vnd sunst alle vnd Jede andere gütter, der thendt vnd vnderthandt, so von dem Geschlecht der Bosen
auff weilandt Philips Bösling von wegen seiner Mütter gefallen vnnd geerbt sein, Wo sy auch vber kurtz oder lang mehr Gütter erfaren würden, so von den Bosen auff Philips Böslingen, wie obgemelt, geerbt
weren, sollen sy dieselben auch anzeigen, vnd von vns vnd vnserm stifft zu Mannlehen empfangen haben vnnd tragen, Vnnd der genant Conradt von Rodenhausen hat auch von wegen sein selbs, auch obgedachter
seiner brüder, Hans Wilhelmen vnd Ebrt Wilhelmen vns solch obgeschriben lehen von vns vnd vnserm Ertzstifft empfangen, daruber in trewen gelobt vnd leiblich ainen aydt zu den heiligen geschworen, vns, vnserm Nach=
kommen Ertzstifft Meintz getrew, holdt vnd gehorsam zu sein, vnsern schaden zu warnen, frommen vnd nutz zu werben, Solch lehen getrewlich zu bedienen, mit trewen darbey sitzen vnd bleiben, die zuuersehen, daruber
zu geloben vnd zu sweren, deß brieff zu geben vnd zu nemen, als dick deß not geschicht, Jm massen Er die Jetzs von vns empfangen, vnnd vns daruber gelobt vnd geschworen hat, Vnd nemlich alles das zu thun, das ain
Mann seinem rechten herren von solchem Erb vnnd Mannlehen von schuldt vnnd pflichtig zu thun ist, vnnd als solches lehenrecht vnd gewonheit ist, Sonder geuerde, Wir haben auch in diser leihung außgenomen
vnser, vnserer Nachkommen vnd Ertzstiffts Meintz, vnser Mann: vnnd ains Jeglichen recht, Alle argelist vnnd geuerde hierinn gentzlich außgeschlossen, Vnnd deß zu Vrkundt haben Wir vnser Jnsigel an
disen brieff thun hencken, Der geben ist zu Aschaffenburg den Eilfften Martii Anno domini Millesimo Quingentesimo Octuagesimo primo. /
Ex Mandato eiusdem R(everendissi)mi D(omi)ni D(omi)ni Danielis