Wir Ferdinandt der Ander von Gottes genaden Erwölter Römischer Kaiser
Zu allen zeitten Mehrer des Reichs in Germanien, auch zu Hungarn vnd Böhaimb König (etc) Ertzhertzog zu Österreich Hertzog zu Burgunndt Steÿr, Kärndten, Krain, vnd Württemberg, in Ober:
vnnd Nider Schlesien, Marggraue zu Mährern in Ober: vnnd Nider Laußnitz, Graue zu Tÿrol vnd Görtz, Bekhennen für Vns, Vnsere Erben vnd Nachkhomben hiemit offent:
lich, demnach der Hochgeborn Vnser lieber Ohaimb vnnd Herr Albrecht Wenzel Eusebius Hertzoge des Hauß Waldtstain vnd Friedlandt Vnser HoffkriegsRath, Cämmerer vnd bestelter Obrister, nach
glückhlich erlangter Pragiischen Victori, vil vnderschiedtliche Rebellen Guetter, in Vnserm Erbkünigreich Böhaimb, in eingefalligen oder gar zu hoch geschätzten Müntzsorten erkaufft, vnd an sich gebracht,
darueben auch Siebenmall Hundert Tausent gulden Rheinisch, Zu Vnsers Kriegswesens nottürfften, in selbigem Werth gestreckht, dargelehen, vnd Ob Wir woll E: L: genedigist ersuchen lassen, daß sÿ in erweg:
ung Vnsers hierunder erlittenen grossen schadens, sich mit Vns gebürlich abfinden, vnd andern theils Satisfaction geben wolten, Sÿ doch hiergegen allerhandt motiuen, vnd Entschuldigungen fürnemblich aber, dieses einge:
wendet, dz obangeregte vnsere Müntzsorten, damahls vormittag der Publicierten Generalien, also gangbar gewest, vnd weillen mit solchen geldtenn, dero Kriegsuolckh, wie auch Vnsere gantze Armada bezalt worden, Wir dabey
kheinen schaden gelitten, Sÿ auch die her verkauffte Guetter, beraits mit der Landtaffel assecuriert, hette vngeacht dessen allen aber, dennoch Vns zu gehorsambisten Ehen vnd zur Recompens Vnserer fürgangenen Läsion
Auch gegen Andern (welche gleichergestalt Guetter an sich gebracht, einen guetten Anfang vnd eingang zumachen dreÿ mall Hundert Tausent gulden Rheinisch in guetter Zuechter Reichswährung, an obberührten pre:
tensionen vnd forderungen gehorsambist nachgelassen, Daß Wir derowegen diese sÿe des Hertzogen von Waldtstaimb vnd Friedlandts E: vnderthänigiste willfährige erzaigung, nit allain zu genedigistem gefallen
an: vnd auffgenomben, sondern derselben hingegen in genedigister erwegung dessen, vnd dann, dz Sÿ Vns zu sonderbarem genedigistem gefallen, vnd befürderung Vnserer Kriegsdienst, im verschinen Sechtzehenhundert dreÿ
vnd Zwaintzigisten Jahr, ain starckhe Anzahl Kriegsuolckhs Zu Roß ain guette zeit lang aus Iren aigenen Vncosten vnderhalten, Auch vber dieses in wärender Rebellionszeit, in allerhandt Occasionen vor andere
vill ansehenliche vnd nutzliche Officia, mit Zusetzung alles des Iriegen praestirt, vnd noch hinfüro Zu laisten gehorsambist erbietig, genedigist Zugesagt vnd versprochen haben, Thun solches auch hiemit Wissent:
lich vnnd in Crafft diß Brieffs also vnnd dergestalt, daß Wir, Vnsere erben, vnd nachkhombende Khönige zu Böhaimb mehrwollermelts Hertzogen von Waldtstainb vnd Friedlandts L: vnd Ire Erben aller vorer:
Zehlter mehrberührter in eingefalligen Müntzsorten außgezahlten gelder, wie auch dero an sich gebrachten Guetter halber genedigist vnd gäntzlich erlassen, vnd dauon allendinges freÿ vnnd ledig gesprochen,
derowegen auch weder anietzo noch in Khünfftig Zu ewigen zeitten, ainigen weittern Zuspruch haben, sondern Sÿ vielmehr dabeÿ genedigist schüzen vnd handthaben wollen, genediglich vnd ohne alles geuährde,
Mit Vrkundt diß Brieffs vnder Vnserm Handt vnd anhangendem Khayserlichen Secret Insigel bekräfftiget, der geben ist in Vnsrer Statt Wien, den fünff vnd zwaintzigisten February, im Sechtzehenhundert
fünff vnd Zwaintzigisten: Vnserer Reiche aber deß Römischen im Sechsten, des Hungarischen im Siebenden, vnnd des Böhaimbischen im Achten Jahre.