Wir Sigmund von gotes gnaden Romischer keyser zu allen czeiten merer desz reichs vnd zu
hungern czu behen(n) ec(etera) kunig Bekenne(n) vnd thun kundt offenbar mit disem briffe allen den dye In sehen
horen lesen dasz fur vns komen ist der edel zdenkel von rozmital vnser liber getrawe vnd hat vnsz
demutiglich gebetten dasz wir Im vnd der Edelen margreten seyner hausfrawe vnd Iren erben
Sechczig schock czinsz vnser kuniglicher bern dye er auff dem closter Chotiessaw vnd von dem Strengen
wilhelm Suppowecz vnserm liben getrawe(n) vmb sechshundert schock Behemischer groschen gekaufft hat dye
selben sechczig schock groschen vnser liber bruder kunig wenczlaw etwan dem Edelen handrecz von Brodky
verschriben hat alsz seynes mayestat brieff dar vber geben clerlicher Inneheldet zu bestetigen vnd zuconfir
miren gnediglich geruchten desz haben wir angesehen desz yegenanten zdenken fleissige vnd demutige bete
vnd auch gutlich betracht soliche getrawe vnd willige dinste dye er vnsz vnd der kron zu Behen(n) offt vnd
dick gethan hat vnd deglich tut vnd furbasz woll tun sol vnd mag in kunfftige czeiten vnd dar vmb mit wol
bedachtem mute gute(m) rath vnd rechter wissen haben wir den vorgen(anten) zdenken vnd margrete(n) vnd Iren
erben dye vorgen(anten) Sechczig schock behemischer groschen vnser kuniglicher Berne vff vnserm Closter Chotiessaw
in aller der masse alsz er dye an sich von dem ege(nanten) Supowecz gebracht hat vnd auch vnsz vorfaran bruders
kunig wenczlaws selligen brieff vber dye selb Sechczig schock groschen lautug gnediglich bestetigt vnd confirmirt
bestetigen vnd confirmirn In dye von Behemischer kuniglicher macht In krafft disz briffs vnd wollen dasz
dye selben zdenke(n) margareth vnd Ire erben dye vorgen(anten) Sechczig schock vnser kuniglicher Berne von dem
Closter Chotiessaw Solang Inhaben neme(n) vnd auff heben sollen bisz wir ader vnse erben vnd nachkome(n)
kunige zu behen(n) von In vmb Sechs hundert schock behemischer groschen widerlosen vnd wir gebietten
dar vmb dem Ersame(n) vnd geystlichen probste desz Closters zu Chotissaw der nu ist oder zu czeiten seyn wirdet
vnserm liben andechtigen ernstlich vnd vestiglich mit disem briffe dasz er den Egen(anten) zdenken Margrethen vnd
Iren Erben dye vorgen(anten) Sechczig schock groschen von vnsern kunigliche(n) Bern alle Iar auff sant martins
tag ganczlich vnd gar richte vnd beczalen alsz lang bisz wir vnsere erben vnd nach komen kunige zu
Behen(n) in Sechs hundert schock Behemischen mit bereytem gelde gericht vnd beczalt haben wan(n) so
offt er dye vorgen(anten) Sechczig schock beczalen wirt den vorgen(anten) zdenken margrethen vnd iren erben So
dick sagen wir in der selben Sechczig schock Behemischer groschen quit vnd ledig mit disem briffe
vnd wer disen brieff mit den Egen(anten) zdenken Margrethe(n) ader Iren erben gute(m) willen Inne haben wirt der
hat alle dye recht czu dem obgen(anten) Czinsz vnd haupgut alsz sy selbes Mit vrkundt disz briffs versigelt
mit vnserm kayserliche(n) mayestat Insigel Geben zu prage nach Cristi geburth vierczehen hundert Iar
vnd dar nach Im Syben vnd dreissigsten Iar am montag nach allerheiligen tag vnser Reiche desz
hungrische(n) ec(etera) Im Eynvndfunffczigste(n) desz Romische(n) Im xxvii desz behemischen Im xviii vnd desz
keysertumbs Im funfften Iare