Wir Hainrich von gotes gnaden Bischoff ze Costenz, Tům brobst und Tůmtechan offenlich mit disem gagenwůrtigen brief allen die in ansehent ald horent lesen, Das wir schuldig
sien und recht und redlich gelten sulen und enschulden unsern lieben brůdern hern Tůring ritter und Wolfharten gebrůdern von Brandes und iren erben ob si enwain, Drů Hundert
Mark silbers lotiges und gůtes friburg(er) schrotes und gewichtes die si uns von unsers erwirdigen herren wegen durch recht trůwe und frůntschaft usgenomen und gewunnen hant ze
friburg und ze Bern, Und die in unser und in des selben unsers gotzhus redlichen und schinbaren nutz korn und bekert sint, Dar zů haben wir inen für uns und all unser
nachkom(en) gelopt und verhaissen ze gebende Zwai Hundert Mark silbs des selben friburg(er) schrotes und gewichtes umb den dienst den si uns und dem gotzhus getan und ver
haissen hant ze tůnde, Und dar umb so haben wir inen und allen iren erben mit gůtem willen unbetwungenlich mit willen und gunst unsers Capitels gemainlich ze dem Tům ze
Costenz und nach irs rate umb die obgen(anten) fünf Hundert Mark silbs ze ainem rechten redlichen gewten pfande usgehabend uns und unsers gotzhus gůter die hienach
benempt sint, Das ist ze Tům ze Důssingen ze Dichtersh(usen) ze Bolingen ze Jegentorf ze Bůchhain ze Sils ze Bůrren ze Aeltingen ze Enegkoven ze Eylach ze hertzogenbůch ze
Dimetowe die an unser gotzhus horent, Und satzen den selben unsern brůdern baiden gemainlich und ungeschaidenlich und allen iren erben die selben gůter recht und redlich mit disem
brief, Also mit dem geding und dir(re) beschaidenhait daz die obgen(anten) her Tůring und Wolfhart gebrůder von Brandes und all ir erben ob si enwain die selben vorgen(anten) gůter
all mit allen nutzen und gewonhaiten und mit allen rechten als si uns und unserm gotzhus zů gehorent hinnan hin gerůwelich und fridlich ze ainem rechten redlichen gewten
pfande an alles abslahen und abmessen der nutze haben niessen und innemen sont als lange und och all die wile wir noch unser nachkom(en) ob wir enwain die selben gůter nit
von inen losent mit den ewigen fünf Hundert Marken silbs die wir inen an barem silber nit aners an all minrung geben sont, Wenn wir losen wend mit solichen rechten
wenn und weles Jars wir ald unser nachkom(en) ob wir enwain ald daz Capitel ze dem tům ze Costenz ald der mer tail des Capitels die dann ze Costenz sesshaft sint den selben hern
Tůring und Wolfhart gebrůdern von Brandes ald ir erben ob si enwain gebent die obgen(anten) fünf Hundert Mark silbs vor sant Johans tag des toffers so sont uns und unserm gotzhus
die selben gůter mit allem recht ledig sin, Und sont uns och die nutz die darnach in dem valen mugen beliben wenne und weles Jars wir inen aber daz selb silb gebent
nach sant Johans tag des toffers so sont aber die selben gůter uns und unserm gotzhus ledig sin aber inen und iren erben sol dann der nechst nutze dess des selben Jars und nit fůro
an all unser und ied(er)man(n)s wider vallen gůt und gantzlich an all gevar, Und ist disu satzung beschehen und volfůrt mit allen den worten sachen und geverden so dar zů horent und
notdurftig en nach gewonhait und nach recht, Nu dar Tůmprobst der techan und daz Capitel gemainlich ze dem tům ze Costenz d(er)kennen dar nach und kunden offenlich an disem
brief daz disu satzung umb die gůter als vor ist beschaiden mit unserm gůten willen und gunst und mit unserm rate beschehen und volfůrt ist luterlich an all gevar als vor gesch
riben stat, Und ze warem und offem urkund und stater stathait aller der vorgeschriben ding geben wir den selben hern Tůring und Wolfhart gebrůdern von Brandes und allen iren
erben dar uber disen brief mit unsers des obgen(anten) Bischoff Hainr(ichs) und des Capitels gemainlich ze dem Tům ze Costenz Insigeln besigelt die wir offenlich dar an gehangen haben, Dis bes
ach und ist der brief ze Costenz geben, Do man von Cristz geburt zalt Trizechenhundert Jar dar nach in dem sibenden und funfzigosten Jar an der nechsten mitwochen nach sant
Ergulen tag in dem Herbst