Ich Hainreich der Lange zv den zeiten Purgermaister ze Wienne. vnd ich Pericht sein hausfrowe. Wir vergehen vnd tvn chvnt allen den die disen brief lesent oder horent lesen die nv lebent
vnd hernach chvnftich sint. Daz wir mit vnser erben gvten willen vnd gvnst mit vrlobchrem mvt vnd mit gesampter hant zv der zeit do wir iz wol getvn mohten. vnd mit vnser Pfarherren
handen Prvder Nyclas von Regenspurch zv den zeiten Comitewr datz sant Johans in der Chaernerstrazze ze Wienne. vnd hern Hansen von der Heiligenstat. Verchauft haben vnsers rechten chaufgvtes
Einen Weingarten der da leit ze Grmatingen an dem Dorffe daz ein Gevch ist. vnd haizzet der Goetler da man alle iar von dient den herren datz sant Johans in der Chaernerstrazze ze Wienne
Zwen Emmer weins zv rechtem perchrecht vnd zwen phenninge ze weinrecht. vnd hern Hansen von der Heiligenstat ainen Emmer weins zv perchrecht vnd ainen phenninge ze weinrecht vnd niht
mer. Den vorgenanten weingarten haben wir recht vnd redleichen verchauft vnd geben mit allem dem nvtz vnd recht. als wir in an perchrechtes gewer her praht haben. Vmb Fvnf vnd Sibent
zich march silbers. ie zwen vnd sibentzig grozzer pehaemischer phenninge fvr dev march. Dez wir recht vnd redleich gewert sein. Dem Edeln vnd dem werden herren. hern Petern
von Rosenberg vnd allen seinen erben. fvrbaz ledichleichen vnd vreileichen ze haben vnd allen irn frvmen da mit ze schaffen verchavffen versetzen vnd geben swem si wellen an allen
Irrsal. Vnd dar vber dvrch pezzer sicherhait. so setzen wir vns ich Hainreich der Lange zv den zeiten Purgermaister ze Wienne vnd ich Pericht sein hausfrowe. Vnverschaiden
leichen mit sampt allen vnsern Erben. vber den vorgesprochen weingarten. Dem Edeln vnd dem werden herren hern Petern von Rosenberg vnd allen seinen erben zw
rechtem gewer vnd shirm fvr alle ansprach als perchrechtes recht ist vnd des Landes recht ze Oesterreich. Swaer aber. daz der Edel herre her Peter von Rosen
berg oder sein erben. an dem vorgenanten Weingarten mit recht dehainen Chriege oder anspruch gewvnnen swaz si dez schaden nement den svln wir in allen ab legen
vnd svln avch si den selben schaden vnverschaidenleich haben avf vns vnd avf allem vnserm Gvt daz wir haben in Lande ze Oesterreich. Vnd daz diser chauf fvrbaz
also staet vnd vnzerprochen beleibe. Dar von so geben wir in disen brief zv einem offen vrchvnde vnd zv einem warn gezevge vnd zv einer Ebigen vestnvnge diser sach
versigilten mit vnserm Insigil. vnd mit vnser perchherren Insigiln Prvder Nyclas von Regenspurch zv den zeiten Comitewr datz sant Johans in der Chaernerstrazze ze
Wienne vnd hern Hansen von der heiligenstat. vnd mit hern Jorgen Insigil an dem Chienmarkte. vnd mit hern Hermans Insigil des Anderleins. vnd mit hern Chvnrates
Insigil in dem Tvmprobst die diser sach gezevge sint mit irn Insigiln. vnd ander frvme Levt genvech den die sach wol chvnt ist. Diser brief ist geben ze Wienne
do von Christes gebvrt waren ergangen Drevtzehen hvndert iar in dem Nevn vnd Zwaintzigisten iar dar nach an Aller Heiligen Tage.